Obxectivo cumprido no Muralla Galicia Emerging. O equipo ven de conservar a categoría e poderá, o vindeiro ano, seguir competindo na División de Honor B feminina do rugby estatal. Dentro do equipo técnico, Jos Portos, un dos adestradores do bloque, amosábase “satisfeito por manternos na categoría”.
O conxunto lucense estaba obrigado gañar ao RC Murcia. Ambos afrontaban o partido como unha auténtica final. Xogáganse todo a unha carta. O que perdera, descendía. O Muralla foi por diante ata o descanso ao que se chegou cun 7-5 pero á volta da parada do xogo o Murcia púxose cun 7-8 ao seu favor froito dun golpe de castigo.
Pese a que o resultado final poidera facer pensar nun final de partido axustado, Jos Portos desbota esa circunstancia “Houbo tensión, o partido estivo rifado, pero antes, non no final. Na última xogada delas rematou con ensaio pero a tempo cumprido”, apostilla o adestrador das galegas.
O resultado final foi de 17-15 a favor das galega. A clasificación coloca así ás rapazas do Muralla como penúltimas na táboa alcanzado o final da competición.
Cal será o futuro do Muralla na vindeira tempada?
Esta tempada estaba plantexada como un periodo de aprendizaxe tanto individual das xogadoras coma do grupo e así foi. O técnico, Jos Portos explicaba que a maioría das xogadoras están “encantadas co proxecto e coa súa formación. A dinámica de grupo que se xerou en so uns meses foi moi boa” explicaba o adestrador unha vez rematada a competición.
Jos Portos, adestrador do Muralla: “A dinámica de grupo que se xerou en so uns meses foi moi boa”
O Muralla Galicia Emerging salvou a categoría e ten agora que decidir cal será o plantexamento do equipo para a vindeira tempada. Este ano o conxunto funcionou como unha franquicia do rugby galego na que teñen militado xogadoras non só de Lugo senon tamén doutros puntos de Galicia. De cara ao vindeiro ano, terá que dirimirse o futuro do bloque e o plantexamento de grupo.
O Muralla xoga a Copa Federación co Ferrol o domingo
Con todo, o Muralla ten un reto máis inmediato sobre a mesa, será esta fin de semana contra o equipo de Ferrol dentro da Copa Federación. O partido disputararse o domingo ás 12:00 horas nas Pedreiras e dará paso as gañadoras á final desta competición.
Un pouco máis adiante, no mes de maio se celebrará o Challenge para acceder á Copa da Raíña de Rugby 7. Unha ocasión para o Muralla que poderá poder experimentar como grupo un sistema de competición diferente e unha modalidade deportiva distinta do Rugby XV. O seven é disciplina olímpica.
FICHA TÉCNICA
MURALLA GALICIA EMERGING (17): Meghan Cassidy, Bordas Mariona, Paula Ben, Carmen Janeiro, Iria Anidos, Danae Viñas, Alba Mur, Coro Repulles, Tania Martínez, María Veiga, Lucía Hurtado, Ana Sedano, Paulina Alcoleas, Guillermina Fernández e Lucía Corrales.
Tamén xogaron: Iria Graña, Alba de la Fuente, Eva Bañobre, Noemí Esteban, Verónica Marí e Antía Piñeiro.
RUGBY MURCIA (15): María Jesús Fernández, Inés Angosto, Sara Salmeron, María del Mar Valero, María López, Charlotte Nabizada, Sebastiana Martínez, Raquel González, María Bermúdez, Mar Ruiz, María Luisa de Ayala, Clara Inmaculada Abadía, Ascensión Martínez e Soledad López-Varela.
Tamén xogaron: Patricia Cegarra, Cristina Torres, Inma Frutos, Raquel Mateos, Sandra Bautista, Begoña Díaz e María Moragas.
ÁRBITRA: Tatiana Yunta. Excluída Alba de la Fuente.
INCIDENCIAS: Partido correspondente á xornada sétima da División Honor B Femenina disputado no Gregorio Pérez Rivera.
MARCADOR:
- Min. 05: Ensaio de Guillermina Fernández.
- Min. 05: Transformación de Carmen Janeiro.
- Min. 14: Ensaio de Elena Soledad López-Varela.
- Min. 38: Golpe de Castigo Elena Soledad López-Varela.
- Min. 64: Ensaio de Dafne Viñas.
- Min. 78: Ensaio de Paulina Alcoleas.
- Min. 80: Ensaio de Raquel González.
- Min. 80: Transformación de Elena Soledad López-Varela.
