Pintaron bastos para as rapazas do Muralla Galicia Emerging na primeira xornada de Liga. Caeron derrotadas por un rotundo 0-35. Un dos adestradores que conforman o corpo técnico, Jos Portos, advertía que este grupo ten dentro moito máis rugby do amosado no primeiro cruce contra o AD Industriales Las Rozas nas Pedreiras. Esta fin de semana terán ocasión de amosalo.
As xogadoras do equipo lucense visitan ao BUC Barcelona na Foixarda o sábado 25 de xaneiro ás 15:00 horas. O rival non é doado, pero coñecen o seu xogo. “Temos referencias delas”, conta Jos Portos. O adestrador explica que logo de visionar vídeos do rival, a súa conclusión é que practican un “xogo moi alegre, moi sinxelo”. As veces, no deporte, o sinxelo é precisamente moito máis efectivo que os plantexamentos técnicos complicados.
Os partidos do BUC Barcelona pódense seguir por streaming, así que no cadro técnico galego houbo tempo de chequear como se desenvolve o seu seguinte rival sobre o tepe. “Xogaron a súa final de Liga en decembro, así que temos unha referencia recente. Tamén puidemos ver o seu primeiro partido de Liga”, di Portos.
Portos: “Saben placar, pasar e están en todos os contactos”
Na súa análise, o técnico do Muralla Galicia Emerging, relata que o BUC Barcelona “sabe xogar ao rugby. Saben placar, saben pasar, e están en todos os contactos”. Pero confía en que se o bloque galego da “o noso cento por cento, poderemos plantarlles cara”. Pola contra, advirte que se as xogadoras “se veñen abaixo, polo escenario, pola viaxe, por crernos inferiores… pois entón terémolo moi difícil”.
Hoxe, venres 24, está previsto un último adestramento na Coruña para preparar o cruce do sábado en Cataluña. O Muralla Galicia Emerging vai realizar un adestramento conxunto co CRAT.
Moi cedo, na mañá do sábado, viaxarán en avión a Barcelona onde ás 15:00 horas xogarán co BUC. O desprazamento e o primeiro dos dous viaxes que o club deberá realizar a Barcelona nesa tempada. Viaxan en avión pero o madrugón supón un esforzo extra para as xogadoras de cara ao partido. Van e volven no día vía Alvedro.
A única xogadora tocada é Lucía Hurtado que ten molestias por un golpe nun hombreiro. Con todo, e á espera do que dé de si o adestramento desta tarde, non parece que vaia ter problemas para ser da partida.
O Muralla, único galego na categoría de prata
Na División de Honra B do rugby español, o Muralla Galicia Emerging é o único representante galego. O equipo está conformado principalmente por rapazas de Lugo pero sumáronselles un grupo de xogadoras de rugby chegadas de diferentes puntos de Galicia. Son deportistas emerxentes, que despuntan e están chamadas a poder dar o paso á elite estatal. Este grupo conformouse coa idea de que o club sexa un equipo franquicia galego para dar saída ás deportistas que destaquen nesta disciplina e facerlles así máis doado o salto á máxima categoría. Por iso, os resultados son importantes, pero o principal obxectivo é a permanencia e a formación de novos valores do rugby feminino galego.
