España xa está en cuartos de final do Mundial 2025 de futsalfem e, ademais, conseguíu ese pase dando un golpe de autoridade e antes de que finalice esta primeira fase.
As futbolistas que adestra Clàudia Pons mostráronse moi superiores a Colombia e deixaron o partido moi encarrilado nuns primeiros 20 minutos impecables. O venres, o partido diante de Canadá será un trámite antes de entrar na fase decisiva do torneo. Marrocos ou Polonia será o rival nese partido, tal e como informa a RFEF.
Unha vez espantados os nervios do primeiro choque, España pareceuse moito máis á súa mellor versión neste segundo partido. Tamén axudou que apenas transcorridos 68 segundos chegaba xa o primeiro tanto. Irene Samper, tras unha boa combinación colectiva, facía o 1-0. Un tanto que deu confianza a España e restoulla a Colombia.
O partido xogábase só nun sentido e os goles foron caendo. Vane Sotelo, nunha acción moi similar á do seu primeiro gol en Filipinas, facía o segundo e Antía Pérez, cun tiro raso, o terceiro. E só levaban pouco máis de seis minutos de xogo. Colombia, mentres, cargábase de faltas e iso aproveitouno España para facer o cuarto, cunha falta sen barreira de Vane Sotelo desde seis metros. E o quinto puido chegar nun lanzamento de 10 metros que a meta colombiana detivo á pivote española.
Na segunda parte mantívose a tónica do choque, con Colombia aumentando o nivel de intensidade. Lograron un tanto, pero foi anulado tras a revisión no Soporte de Vídeo por unha falta a Laura Córdoba, mentres España buscaba que non se complicase o partido, E así chegou o quinto, cando Irene Córdoba aproveitou un rexeite a un remate de Antía Pérez.
Colombia achégase a España
A falta de nove minutos, Colombia logrou acurtar distancias, nun córner que rebotó en Irene Córdoba e sorprendeu a Elena. Aínda así, a vantaxe española era clara. Iso tamén causou que o ritmo das futbolistas que prepara a seleccionadora Clàudia Pons baixase, o que permitiu a Colombia ter algunhas ocasións, aínda que a vitoria nunca chegou a perigar.
FICHA TÉCNICA
ESPAÑA: Elena, Laura Córdoba, Irene Samper, María Sanz e Irene Córdoba – quinteto inicial -. Tamén xogaron: Noelia, Dany, Cecilia, Ale de Paz, Laura Sánchez, Vane Sotelo, Antía Pérez, Martita e Cris (p.s.).
COLOMBIA: Allison Olave, Danna Rodriguez, Melissa Jaimes, Merlin Salcedo e Nicole Mancilla – quinteto inicial -. Tamén xogaron: Karen Torres, Elizabeth Guerra, Isabella Mosquera, Alejandra Apraez, Angely Camargo, Dayana Rivera, Laura Bustos, Diana Celis e Paula Valencia (p.s.).
GOL: 1-0 2′ Irene Samper. 2-0 6′ Vane Sotelo. 3-0 7′ Antía Pérez. 4-0 15′ Vane Sotelo. 5-0 29′ Irene Córdoba. 5-1 32′ Irene Córdoba, en propia porta.
EQUIPO ARBITRAL: Kana Saito (Xapón) e Nurul Janah (Malaisia). Amoestaron a Antía Pérez, María Sanz, Dayana Rivera, Melissa Jaimes, Isabella Mosquera, Laura Buscos e Alejandra Apraez.
INCIDENCIAS: Xornada 2. Fase de grupos. Mundial Filipinas 2025. PhilSports Area (Manila).
