Todo na vida ten un lado bo e un lado malo. Xustamente das palabras do adestrador do Ourense Envialia, Gonzalo Iglesias Morenín, pódese extraer esa lectura. Cando fai balance deportivo do ano 2020 recoñece que o mellor e o peor o viviu o equipo ourensá en Málaga. O bo foi xogar a fase final da Liga, estar entre as mellores, o peor a tristura que se lle quedou ao caer nos penaltis. E cando fala da COVID atopa unha ensinanza en metade da dureza da pandemia: “fíxonos facer cousas diferentes como vídeo reunións. Fíxonos cambiar, tanto a preparadores físicos como adestradores, o típico adestramento habitual”.
Balance deportivo do 2020: “Fixemos unha gran tempada”
Para a súa argumentación neste capítulo, Morenín apunta que o balance deportivo 2020 divídeo en dúas partes separando as empadas que engloba.
“O curso pasado creo que, ao final, o equipo estaba en terceira posición, facendo unha gran tempada. Digamos que eramos, outra vez, o mellor equipo dos mortais, entre comiñas, salvando as distancias con Burela e Atlético de Madrid. Xogamos a fase final en Málaga, tivemos a mala fortuna de perder nos penaltis pero despois de todo o que pasou co COVID e non adestrar, creo que o equipo deu a cara en Málaga e cumprimos o obxectivo que tiñamos”
Segundo apunta o entrenador galego: “Quizáis o único ‘pero’ sexa a eliminación na Copa da Raíña, pero como ao final aquí tamén nos estamos pegando en oitavos de final con Poio, pois perder contra Poio na súa pista non é nada anormal. É un partido moi igualado”.
Pensando xa na competición da tempada en curso que corresponde ao ano 2020, o adestrador do Ourense Envialia explica que na “segunda metade desta tempada creo que no mes de decembro arranxamos moitas cousas dos problemas que tivemos. Tivemos moitas lesións. Foi unha tempada que, a partir de setembro, empezamos tarde a adestrar, tivemos casos COVID, tivemos moitos partidos aprazados, o equipo non colleu ritmo, moitas lesións. Lesiónasenos Sara Moreno, que era nosa referencia en ataque posicional e creo que a partir do mes de decembro reconducimos ben a situación. Encadeamos xa moitos adestramentos e partidos seguidos”.
Para Morenín, “hai un punto de inflexión, que é a derrota de Poio. Contra Poio en casa 1-5, e a partir de aí encadeamos seis vitorias consecutivas. A nivel anímico tamén nos veu moi ben. Xa estamos en cuartos de final da Copa da Raíña, que creo que é un éxito fantástico porque onte pasamos a penaltis e enfrontabámonos a un Poio que era un dos equipos máis en forma da competición”.
Tamén apunta o adestrador do Ourense Envialia que “en Liga, ao final volvemos estar na pomada, reconducimos a situación gañando o últimos catro partidos e a ver como se presenta o ano novo. Recuperaremos xente, recuperaremos lesionadas e eu creo que pinta ben”.
O mellor e o peor do 2020?: “Málaga”
“Creo que o mellor do ano 2020 foi poder xogar a fase final da liga en Málaga e creo que tamén o momento máis triste foi cando perdemos a penaltis”, explica Morenín.
Para o adestrador do Envialia, “quizais outra cousa que é mala é o que nos pasou a todos. Xa non falamos a nivel deportivo, senón a nivel de sociedade, con todo isto do tema do COVID, que creo que tamén nos ensinou. Se buscamos o lado positivo, fíxonos facer cousas diferentes como vídeo reunións, moito traballo a través de vídeo chamadas? fíxonos cambiar, tanto a preparadores físicos como adestradores, un pouco o típico adestramento habitual”, valora o técnico galego.
Que pide o equipo ao 2021?: “Non ter moitas lesións”
A saúde e as lesións son un clásico do deporte, pero o certo é que cando un equipo ou unha deportista, ten que afrontar lesións, a súa capacidade competitiva anúlase. Así que é moi lóxico que tamén Morenín lle pida ao 2021: “que non teñamos moitas lesións, que recuperemos á xente que está tocada canto antes e que podamos estar na pomada en todas as competicións que xoguemos”.
En termos competitivos lembra que teñen por diante: “a Copa da Xunta do ano pasado, a Copa da Raíña e a Liga. Chegar o máis lonxe posible e, sobre todo, que volvamos ser (que creo que xa o estamos conseguindo) o gran equipo compacto e competitivo que eramos as últimas tempadas”.
