Rematada a Copa Galicia de fútbol sala feminino que organiza a Real Federación Galega de Fútbol e xa co Pescados Rubén Burela como campión, ambos os dous técnicos atendían aos medios de comunicación. No caso do adestrador do Ourense Envialia, Gonzalo Iglesias, Morenín, comezaba a súa comparecencia parabenizando ás súas pupilas: “Quero felicitar ao equipo porque dadas as circunstancias que nos pasaron este ano temos chegado na mellor forma a este partido. Puidemos adestrar dúas semanas con practicamente todas as xogadoras ‘sas’, sen falar das lesionadas de longa duración”
Gonzalo Iglesias, Morenín, falaba do complicado que foi sobreporse a un gol aos 50 segundos e loubaba por iso as súas xogadoras. “Gañarlle ao Burela é complicado, polo equipo que ten, con todas as rotacións que ten… e se aínda encima encaixas ao principio… O gol xerounos dúbidas. Quizais nos faltou empatar o partido, ou pornos 2-1, aquel balón ao pau que nos entra… Faltounos estar máis preto de meterlles dúbidas no corpo”, analizaba o adestrador do Ourense Envialia logo da disputa da final da Copa Galicia de fútbol sala feminino.
“Fixemos un esforzo grandísimo, estou moi orgulloso das xogadoras. Creo que o resultado é moi avultado para o visto na pista. Pero o deporte é así. Hai que felicitar ao Burela que é campión e esperar ao ano que vén”, declaraba o técnico co conxunto subcampión, que admitía que “perder por tanta diferenza, ao final aféctache.
Mentres nos deron as forzas puidemos pornos 1-2, pero o 0-3 xa nos matou. O resultado é o que é”.
Mirando cara ao futuro, Morenín falaba da Primeira División e lembraba: “Quédannos aínda dúas xornadas de Liga. A ver se María Arias e as xogadoras lesionadas poden afrontar ben estes dous últimos partidos e podemos ser ‘xuíces’ da competición. Creo que por honrar a competición e a nós mesmas habemos de tentar gañar ao Melilla e ao Alcorcón. Hai equipos que se están pelexando polo play-off e podemos ser nós as xuíces. E gozar! Que con todo o que nos pasou este ano, toca gozar e irnos ás vacacións cun bo sabor de boca”, remataba dicindo Morenín.
