Ao final do cruce entre Viaxes Amarelle FSF e Ourense Envialia (2-3), os técnicos, Jorge Basanta e Morenín, facían as súas valoración sobre o partido. En ambos os dous casos, salientaron o nivel do rival.
O adestrador do Viaxes Amarelle FSF, Jorge Basanta felicitaba ao “Envialia pola vitoria”, pero tamén explicaba que na súa opinión as coruñesas non mereceron “a derrota, non por que o Ourense Envialia non merecese a vitoria, pero coido que na segunda parte nos tivemos ocasións para levarnos o empate”.
Explicaba Jorge Basanta que o “desgaste que temos feito, tanto o meu equipo coma o Ourense Envialia, ten sido digno dun partido de Primeira División, como ten que ser. Sabiamos que era un partido super complicado e tentamos levalo ao noso terreo. Na segunda metade por xogo e por actitude e intensidade, merecémonos máis”.
Ver esta publicación en Instagram
Morenín: “Os tres puntos saben a gloria con todo o que nos está pasando”
Pola súa banda o adestrador das ourensás, Gonzalo Iglesias, Morenín, destacaba que o Viaxes Amarelle “é un dos equipos que mellor se reforzou”, e salientaba que a lesión de Martita tiña sido “chave” para as coruñesas. O técnico das ourensás loubou o xogo das locais no arranque do partido “O Viaxes Amarelle foi moito mellor o primeiros cinco minutos. O gol de estratexia deunos outro aire e a partir de aí o equipo xa foi mellor”.
Morenín, adestrador do Envialia: “Faltounos manexar os tempos do partido”
O técnico das ourensás argumentaba que na segunda metade ás visitantes faltoulles “manexar os tempos do partido. Cun 1-3 é un partido para porche 1-4, 1-5, 1-6 para estar con máis tranquilidada xa que tamén tivemos a lesión de Andrea e viñemos con poucas rotacións. E ao final nun erro pónseche 2-3 e xa éntranche as dúbidas os nervios. Estabamos moi cansas. O tempo morto pídoo para descansar”.
Morenín, adestrador do Envialia: “O Viaxes Amarelle foi moito mellor o primeiros cinco minutos. O gol de estratexia deunos outro aire e a partir de aí o equipo xa foi mellor”
O entrenador do Ourense Envialia, Morenín, sinalaba que o seu equipo sufrira “os últimos catro minutos. Ao final estás a un gol de vantaxe e o rival tamén xoga e faio ben. A situación de porteira xogadora xérache dúbidas e creo que a defendemos ben. Ao final este tres puntos saben a gloria despues de todo o que nos está pasando este ano”.
Andazo de lesións no Envialia
Non está sendo un ano doado para o Envialia. “Aparte da COVID e confinamento, que nos está pasando a todos os equipos, están as lesións”, segundo lamenta Morenín. O adestrador explica: “Levo tres anos aquí e os dous primeiros anos non tivemos lesións. Pero este ano levamos: Sara Moreno, 5 meses, Lucía, o cruzado, Jenny hoxe non participou, María Arias estaba confinada por tema COVID, Andrea lesiónase durante o partido e non xoga a segunda parte… máis cousas non creo que nos pasen. Dicíalles no descanso que todo isto tiña que unirnos de face á segunda parte. Ao final dáslle moito máis valor á vitoria”.
Como outros compañeiros de tarefas no deporte, como adestrador, Gonzalo Iglesias bota en falta deste curso a pretempada. “É moi importante”, argumenta o técnico. “Nós non empezamos a pretemporada ata que tivemos permiso do concello para poder adestrar con continuidade. Non fas a pretemporada habitual, non xogas amigables… No segundo mes de competición nós temos un positivo e confínannos. Logo imos xogar un partido e confinan ao outro equipo… E non xogas… Son moitas idas e vidas”, apunta.
Morenín: “Os preparadores físicos teñen un mérito increible neste ano e medio”
Para Morenín, “este último ano e medio os preparadores físicos teñen un mérito increible por que se teñen que reinventar. Todo o que está a pasar fai que non teñas continuidade no xogo, que haxa lesións musculares, e que a preparación física, non é que non sexa a adecuada, é que ten moitas interferencias. Por exemplo, nós na Copa da Raíña tivemos que xogar o 4 de xaneiro. Todo o que tiñamos programado a semana anterior tivemos que cambialo. Hai tantos cambios pola competición e polo COVID que é difícil”, sostén o adestrador.
O Ourense Envialia lévase o duelo entre galegas diante dun correoso Viaxes Amarelle (2-3)
