As canteirás Laura Morais e Cristina Barbosa apostaron por seguir en casa a próxima tempada. A extremo esquerdo, que regresou á Guarda tras xogar no Canyamelar Valencia, tivo unha tempada para esquecer ao encadear varias lesións. Pola súa banda, Barbosa tivo que afacerse a xogar no extremo para cubrir a ausencia de Morais e dar descanso a Lorena Pérez. Con elas, o persoal 2020-2021 do Mecalia Atlético Guardés conta xa con once integrantes: Carratú, Sempere, Pérez, Buforn, Descalzo, Gómez, Valero, Urban, Mazza, Morais e Barbosa.
Laura Morais: “Que volvesen a confiar en min deume moita motivación”
A extremo esquerdo Laura Morais (Camposancos, 14/01/1996) regresou o verán pasado a casa. A moza canteirá incorporouse a un equipo renovado e por causa das lesións tivo que aprazar máis do esperado o seu desexo de volver lucir a camiseta do Guardés na Sangriña.
Catro anos fose e unha volta a casa que “se viu truncada por dúas lesións consecutivas”, lamenta Morais. Primeiro foi o ombreiro e cando estaba xa coa posta a punto para incorporarse á competición a rotura de ligamento cruzado anterior da súa perna dereita expúxolle un futuro de entre seis e sete meses de espera. Estas dúas lesións impedíronlle xogar e a irrupción do Covid-19 fixo o resto.
“O ‘obxectivo’”, conta, “era poder disputar ou polo menos ser partícipe do derbi”, aínda que os tempos antollábanse apurados, “era consciente de que sería precipitado porque cumprín 6 meses de operación o 18 de maio”.
Laura Morais, xogadora do Guardés: “O obxectivo era poder disputar ou polo menos ser partícipe do derbi. Estou moi contenta e orgullosa por poder pisar a pista como local na Guarda”.
Xa de fronte ao futuro e comprometida co traballo diario recoñece estar “moi contenta e orgullosa por poder pisar a pista como local na Guarda” e que ten “moitas ganas de poder gozar da afección desde o campo”, conta Morais.
“Que volvesen a confiar en min deume moita motivación para chegar á pretemporada coas pilas cargadas e lista para competir”, agradece a extremo esquerdo quen tamén confesa que este ano, “moi duro”, “a pesar de estar fóra a nivel deportivo sentinme moi partícipe e creo que iso non pasa en todos os sitios”, di Morais con respecto ao equipo. “Merece a pena formar parte deste grupo, creo que é súper bonito”, destaca.
Cris Barbosa: “Ilusióname seguir gozando deste deporte na miña casa”
A primeira liña Cristina Barbosa (Goián, 20/10/1996) tamén seguirá no Mecalia Atlético Guardés a próxima tempada. A moza xogadora apostou por asumir o salto de categoría a próxima tempada e tras uns meses nos que puido competir na máxima categoría do balonmán feminino español, competición europea e a Copa da Raíña móstrase impaciente co inicio da actividade: “Ilusióname pensar que o ano que vén poida ser igual ou mellor que este”, conta.
Barbosa, primeira liña, tivo que adaptarse, como o resto do persoal, ás necesidades do grupo ante as adversidades. A lesión de longa duración de Laura Morais foi unha delas e por iso foi habitual ver a Barbosa no extremo esquerdo como substitución de Lorena Pérez. Xunto á ilusión de “seguir gozando deste deporte na miña casa” únese xa o recordo dunha tempada convertida en “unha experiencia incrible”. Experiencia froito de vivir “momentos que che fan superarche cada día un pouquiño máis, pero dos que vale a pena a recompensa”.
Cristina Barbosa, xogadora do Guardés: “Quero seguir gozando deste deporte na miña casa. Aquí vivín momentos que che fan superarche cada día un pouquiño máis, pero dos que vale a pena a recompensa”.
A tempada compartida con “persoas incribles” déixalle a Cristina Barbosa a “ espinita de vivir a miña primeira fase final da Copa da Raíña”, á espera de que se poida disputar nos próximos meses. “Non poder despedirnos xogadoras e afección na pista pode facer que o ano que vén collámolo con máis ganas”, adianta.
