No Concello da Coruña, a Xunta de Goberno Local aprobou hoxe, mércores 10 de marzo, as bases reguladoras da convocatoria pública de concorrencia competitiva das bolsas para as e os deportistas da cidade 2021.
As persoas beneficiarias deberán ser deportistas federadas, de calquera categoría, de deporte individual e que estean empadroadas no concello da Coruña cunha antigüidade de polo menos dous anos.
O importe global das axudas ascende a 90.000 euros, 30.000 euros máis que na anterior convocatoria en que se concederon 65 bolsas.
O Goberno local considera necesario aprobar por segundo ano consecutivo unha liña de axudas a deportistas individuais da cidade que teñan o carácter de bolsas: “Somos conscientes das dificultades que teñen moitos e moitas deportistas individuais para poder levar a cabo os seus adestramentos e competicións, polo elevado custo que supoñen os desprazamentos, licenzas federativas, e equipamentos”, explicou a concelleira de Deportes, Mónica Martínez, sobre estas axudas.
A concelleira da Coruña resaltou que con estas axudas “preténdese facilitarlles a súa participación en competicións deportivas de alto nivel” e valorou o traballo realizado polo Servizo Municipal de Deportes para que a convocatoria estea aprobada antes do final do primeiro trimestre: “Faltan catro meses para os Xogos Olímpicos, cinco para os Xogos Paralímpicos, e xa se empezan a programar multitude de campionatos de España e de Galicia. As e os nosos deportistas entrarán dentro dunhas semanas no tramo de máxima esixencia e desde o Goberno local que encabeza Inés Rey queremos axudalas/os e apoialas/os na medida das nosas posibilidades”.
As persoas beneficiarias deberán ser deportistas federadas, de calquera categoría, de deporte individual e que estean empadroadas no concello da Coruña cunha antigüidade de polo menos dous anos.
As bolsas clasifícanse nas seguintes categorías:
- Bolsas para deportistas individuais con opcións de participar nos próximos Xogos Olímpicos: 3 bolsas por un importe de 5.000 euros cada unha.
- Bolsas para deportistas individuais con opcións de participar nos próximos Xogos Paralímpicos: 3 bolsas por un importe de 5.000 euros cada unha.
- Bolsas para deportistas individuais con opcións de participar en campionatos mundiais, europeos, nacionais e autonómicos: 5 axudas de 3.500 euros cada unha para participar nos campionatos do mundo, 6 axudas de 2.500 euros cada unha para campionatos de Europa, 15 achegas de 1.500 euros cada unha para campionatos de España e, por último, 10 axudas destinadas a participar en campionatos autonómicos por un importe de 500 euros cada unha.