Monforte de Lemos acollerá mañá, sábado 21 de xaneiro de 2023, o Campionato Galego Adulto de Técnica e Freestyle de taekwondo. A cita conta con máis de 180 inscricións e preto de 30 árbitros/as. Esta proba é moi importante xa que outorga puntos para o ránking galego e é clasificatoria para o Campionato de España.
O torneo comezará ás 09:30 horas, coa disputa do Galego de técnica absoluto, no que se conta con máis de 160 inscricións, entre os que se atopan medallistas nacionais e internacionais.
A partir das 13:30 horas dará inicio o Galego de Freestyle, con máis de 30 inscricións e tamén un enorme nivel, dada a calidade das e dos nosos taekwondistas.
No caso das probas individuais este Campionato Galego de taekwondo outorga puntos para a clasificación para o Campionato de España, que se celebrará en febreiro en La Nucía (Alacante). No caso das parellas, tríos e quintetos, os campións galegos acadan a clasificación directa, segundo informa a Federación Galega de Taekwondo.
