O Pavillón da Pinguela de Monforte de Lemos será a sede do Campionato Galego de Combate, Técnica e Freestyle de Taekwondo. Os tres campionatos vanse celebrar de forma continuada o sábado 18 de xaneiro e contan con máis de 300 persoas inscritas.
Será a primeira proba do ano 2019 para o Taekwondo galego, despois do parón polo Nadal, e ademais é moi importante para decidir as seleccións galegas que acudirán aos campionatos de España nas diferentes modalidades.
O torneo comezará ás 09:00 horas, coa disputa do Galego de Combate absoluto no que participarán oitenta deportistas, entre os que se atopan medallistas nacionais e internacionais, tanto na categoría masculina como feminina. Ademais vaise contar con 30 árbitros para dirixir os combates.
Pola tarde (16:00 horas) celebraranse os Galegos de Técnica e Freestyle. En técnica adultos hai 180 deportistas inscritos, mentres que en freestyle son 60 e teremos 29 xuíces.
Desde a Federación Galega de Taekwondo destacan “o enorme nivel das e dos nosos taekwondistas, xa que poderemos gozar de actuacións con medallas tanto a nivel nacional como internacional”.
O torneo será organizado polo club Neka en colaboración coa Federación Galega de Taekwondo e o Concello de Monforte.
