Moaña é o escenario elixido para acoller este sábado, 27 de marzo, o Campionato Galego Absoluto de Técnica. Neste torneo, marcado polas medidas anti COVID-19 e celebrado a porta pechada, participarán ata cen deportistas. Nel decidirase a selección galega que irá ao Campionato de España.
Seguindo as medidas de seguridade sanitaria, só se disputarán as probas en categorías cadete, júnior, sénior (1 e 2) e máster (1,2,3 e 4), tanto masculinas como femininas. Ao recinto da vila pontevedresa acudirán 130 persoas, sumando deportistas, técnicos, xuíces e membros da organización. Todas elas deberán realizar un test de antíxenos, con resultado negativo, nas 24 horas antes da celebracoón do Absoluto de Técnica, e poderán facelo nunha das tres sedes habilitadas: Moaña, Betanzos e Monforte.
O recinto deportivo de Moaña non abrirá as súas portas ao público
Neste campionato só se utilizarán dúas pistas e estas desinfectaranse antes de cada participación. Seguindo a normativa, o Absoluto de Técnica celebrarase a porta pechada pero poderá seguirse vía streaming grazas á Federación Galega de Taekwondo.
Á presentación deste campionato acudiu a alcaldesa de Moaña, Leticia Santos, a concelleira de Deportes, Dolores Chapela, o concelleiro de Mobilidade, Accesibilidade e Vivenda, Rodrigo Currás e a directora do Hebe, organizador do torneo, Noelia Pérez.
