O Comité Galego de Adestradores da Real Federación Galega de Fútbol volve á carga hoxe, cunha xornada formativa online na que participarán Miroslav Djukic, adestrador do Sporting de Gijón, e Paco Jémez, técnico do Rayo Vallecano.
Miroslav Djukic chegou ao banco do Sporting o pasado mes de decembro. O serbio regresou desde xeito ao fútbol español onde acumulou experiencia nos bancos do Hércules (2011), Valladolid (2011-2013), Valencia (2013) e Córdoba (2014-15). O seu principal éxito foi o ascenso a Primeira co Real Valladolid en 2012, na súa única tempada en Segunda á fronte do equipo valisoletano ao que mantivo despois na máxima categoría. Djukic destacara antes como futbolista na Liga Española, no Deportivo (1990-1997) e no Valencia (1997-2004).
Paco Jémez é natural de Las Palmas de Gran Canaria. Comezou a súa carreira profesional como futbolista en 1989 no Córdoba CF. Tras 15 anos na alta competición pasando por equipos como o Raio Vallecano ou o RC Deportivo entre outros, e xogar en 21 ocasións coa Selección Absoluta, colgou a botas en 2006.
Un ano despois iniciou a súa carreira como adestrador de grandes clubs. Un total de 9 equipos puxéronse nas súas mans, entre eles o Córdoba, o Granada, o Cartagena, a UD Las Palmas, o Cruz Azul mexicano ou a Rayo Vallecano.
En directo na canle de Youtube da RFGF
A xornada online “Falemos de Fútbol con Miroslav Djukic e Paco Jémez” comezará ás 19.30 horas e será retransmitida en directo na canle oficial de Youtube da Real Federación Galega de Fútbol (Canle da RFGF).
