Eles teñen dúas e nós queremos acadar a primeira, e para iso precisamos o voso apoio. O martes 11 á 20hrs comeza a nosa andaina na Copa da Raíña e facémono en Abanca-Riazor. Vén animarnos.
#DéporAbancaValenciaCopaDeLaReina🏆 #CumpliendoSueños
A que fala é Miriam Ríos, capitá do RC Deportivo ABANCA que o vindeiro martes recibe na Copa da Raíña ao Valencia C.F. Curiosidades do destino.
A imaxe que acompaña ao texto que lles acabo de transcribir é do trofeo da Copa do Rey que o RC Deportivo masculino, lle gañaba no ano 1995 ao Valencia CF.
O club herculino decidiu que este partido era un bo momento para testar se a resposta dos seareiros cara o equipo feminino pode ir un paso máis aló e trasladar partidos a un recinto de maior aforo.
Chegoulle a hora ao que os deportivistas chaman #ANosaForza. A xente. A afección. Un elemento que, polo de agora, non faltou na súa cita con #AsNosas deportivistas, nin no Ponte dos Brozos arteixán, nin na Cidade Deportiva de Abegondo, nin incluso en desprazamentos a lugares como Cataluña onde a Peña Deportivista de Barcelona Miau-Miau estivo aí alentándoas.
Moi probablemente ese apoio da grada é debido non só á paixón branquiazul que poida latexar nos seus peitos, se non tamén a que elas, e o seu fútbol, non só non decepcionan, se non que enganchan.
O reto é que o estadio municipal de ABANCA-Riazor presente unha boa entrada. Diso fala a capitá, a heroína María Pita, que seguro que moitas de vós tedes visto como protagonista da campaña de abonados do Dépor deste ano.
O que me chama a atención, unha vez máis, é a capacidade que ten esta futbolista por trasladar ilusión, paixón e competitividade sa nas súas intervencións, xa sexan en medios de comunicación ou nas súas redes sociais. O seu discurso é sempre positivo, alentador e contaxia.
Ten madeira de líder. É das que predica co exemplo, como a súa resilencia, capacidade de superación diante da adversidade (consulten o seu historial de lesións) e de loita por acadar os soños (díxolle con sete anos á súa nai que había xogar no Dépor e miren…).
Hoxe ten outro soño: xogar no templo branquiazul, Riazor, un partido oficial de Copa e ver moito público na grada mentres vencen un rival da talla do Valencia C.F. A cita é o martes 11/02/2020 en Riazor (A Coruña).
Cada vez máis, como espectadores, buscamos coñecer os protagonistas das noticias polas súas publicacións en redes sociais. Acontece igualmente no caso de novas deportivas e coas deportistas.
Nin gula, nin pereza, nin ira, nin soberbia, Miriam peca de envexa
Pois ben. Saiban que a miña conclusión logo de ler esta publicación en Instagram da deportivista Miriam Ríos é que a zagueira branquiazul apúntase a un pecado capital. Non é a gula, nin a pereza, nin a ira, nin a soberbia… A coruñesa peca de envexa, neste caso, da sa. Porque ata para pecar pode un ser elegante. Se eles teñen dúas, elas, esta xeración de futbolistas deportivistas, quere, para empezar, unha Copa da Raíña que sumar ás tres anteriores.
Si. Leron ben. A Coruña ten tres Copas da Raíña. Conqueriunas o Karbo Deportivo. No palmarés das tres primeiras edicións o torneo do K.O. figura, na súa categoría feminina, a cidade herculina. Foi nos anos 1983, 1984, e 1985. E, se non teño mal o dato, xa daquela o Karbo era sección do RC Deportivo.
Agora, 35 anos despois, as deportivistas queren volver facer historia e que as novas xeracións coñezan o doce sabor de ser campioas e levantar unha copa.
Probablemente na cabeza de Miriam Ríos está o berro de inicio de tempada: “Deportivistas, quen teñan honra, que me siga”.
Bendita envexa sa que nos fai medrar e ser mellores cada día!
Ver esta publicación en Instagram
