É unha das facianas máis recoñecibles do Dépor ABANCA. Miriam Ríos, unha das capitás do equipo branquiazul foi elixida polo club esta tempada para ser a imaxe da campaña de aboados encarnando nada menos que á heroína coruñesa María Pita. Ela é tamén unha loitadora. Admite que houbo unha “evolución” grande en materia de igualdade no deporte desde que ela empezou a xogar, pero advirte que segue “habendo moitísimas trabas”. Como proposta para mellorar di que mudaría “a mentalidade da xente para que non vexan que hai un deporte feminino ou masculino”.
A.N.: Consideras que o papel da muller no deporte é igualitario?
Miriam Ríos: Non, a verde é que non. Non é igualitario. Nós no fútbol temos moitísima sorte. Estamos chegando a cotas máis altas máis de presa ca noutros deportes minoritarios femininos pero seguimos sen ter igualdade.
A.N.: Ao respecto da anterior pregunta, responde Galicia ao patrón estatal ou observas diferencias? En caso de ver diferencias, a situación galega sería mellor ou peor que a estatal?
Miriam Ríos: Creo que é unha tónica en todas as comunidades. É estatal.
Miriam Ríos, capitá do RC Deportivo: “No fútbol estamos chegando a cotas máis altas máis de presa ca noutros deportes minoritarios femininos pero seguimos sen ter igualdade”
A.N.: En que momento da túa vida tropezaches por vez primeira cunha discriminación por xénero no deporte?
Miriam Ríos: A min desde pequeniña gústame xogar ao fútbol. Os nenos do parque pensaban que unha nena non podía xogar a o fútbol. Pero cando comecei a xogar nun equipo non tiven ningún problema cos compañeiros, adestradores ou directivos. Si cos pais. Si que había insultos. Pero eu o que facía era xogar a o fútbol, tres caños, catro goles e xa estaba.
A.N.: Observas que por ser muller existen maiores dificultades para a práctica deportiva a niveis de competición?
Miriam Ríos: Si, por suposto. Sobre todo dificultades económicas, de medios, recursos para practicalo e ter competicións. Por exemplo, a competición no fútbol é profesional desde hai catro ou cinco anos. Antes non era.
A.N.: Na túa opinión, hai límites ou teitos de cristal para o acceso da muller a diferentes postos no mundo do deporte á marxe do papel de deportistas (adestradoras, directivas, preparadoras físicas, etc)?
Miriam Ríos: Si. E sobre todo no mundo do fútbol é moi complicado que sexa unha muller preparadora física ou adestradora. Adestrar a homes é moi complicado velo. Si a nenos, pero en categorías cadete, xuvenil ou sénior é máis complicado. Coñezo casos pero mínimos.
Miriam Ríos, capitá do RC Deportivo: “No mundo do fútbol é moi complicado que sexa unha muller preparadora física ou adestradora. Adestrar a homes é moi complicado velo”
A.N.: Con respecto a cando empezaches a túa vinculación co deporte, hai agora menos trabas? Houbo unha evolución positiva no tempo?
Miriam Ríos: Si, claro. Evolución houbo moitísima. Segue habendo moitísimas trabas pero do que tiñamos antes, ao que temos agora non hai comparación. Imos dando pasos pero a través de moito traballo e moita loita.
A.N.: Cales consideras que son os principais atrancos que ten hoxe unha muller para desenvolver unha carreira deportiva?
Miriam Ríos: O económico, sobre todo. Non te podes dedicar exclusivamente a o deporte e vivir del por que os cartos non dan. Nos no mundo do fútbol temos moitísima sorte pero, aínda así, non podemos dedicarnos exclusivamente ao deporte. Creo que é o hándicap máis salientable.
Miriam Ríos, capitá do RC Deportivo: “O hándicap máis salientable que temos as mulleres é o económico”
A.N.: Pódese vivir do deporte sendo muller?
Miriam Ríos: No meu caso non. Sei que hai moitos casos de mulleres futbolistas que poden, pero eu aínda non, espero chegar algún día.
Miriam Ríos: “Cando tes que estudiar, traballar e adestrar quítaslle tempo ao sono”
A.N.: Como limita a progresión ter que compaxinar a práctica deportiva con outro tipo de actividades profesionais?
Miriam Ríos: Tes que estudiar outras cousas, tes que traballar… iso require moito tempo que en vez de dedicalo a adestrar, ou descansar tes que dedicalo a iso para poder sobrevivir. Quítaslle tempo ao sono, que é moi importante, comes mal… e iso reflíctese na práctica deportiva.
A.N.: Que mudarías do deporte actual para camiñar cara a unha igualdade plena?
Miriam Ríos: E que hai moitas cousas que cambiar! Cambiaría a mentalidade da xente. Que non vexan que hai un deporte feminino ou masculino. Que vexan que futbolistas somos futbolistas todos, non masculino ou feminino, so fútbol. E noutros deportes o mesmo. Creo que cambiándose iso, mudaríanse moitas cousas.
Miriam Ríos, capitá do RC Deportivo: “Hai tantas cousas que cambiar! Sobre todo a mentalidade da xente”
A.N.: Hai quen avoga polo deporte mixto máis aló da base como unha posibilidade? Es partidaria?
Miriam Ríos: Canda comecei a xogar ao fútbol xogaba cos nenos. As diferencias físicas nótanse moitísimo. A nosa xenética é moi diferente, nalgunha cuestión se notaría diferencia, pero… por que non?
Miriam Ríos, capitá do RC Deportivo: “Deporte mixto? Por qué non?”
A.N.: Cres que o deporte feminino está a vivir un momento doce?
Miriam Ríos: Si, cada vez préstannos máis atención. Cada vez hai máis visibilidade nos medios. Hai máis empresas, clubs, que apostan por nós, as mulleres… estamos aí, pero hai que loitar para seguir subindo.
Miriam Ríos, capitá do RC Deportivo: “Cada vez hai máis visibilidade nos medios. Hai máis empresas, clubs, que apostan por nós, as mulleres… estamos aí, pero hai que loitar para seguir subindo”
A.N.: Ao fío desta última pregunta valora de 0-10 (sendo 10 o mellor) o momento actual do deporte feminino nestes ámbitos:
Miriam Ríos:
- Resultados deportivos _____________________ 10
- Visibilidade en xeral na sociedade _________ 5
- Repercusión mediática ____________________ 6,5
- Apoio de seareiros/as _____________________ 8
- Patrocinios ________________________________ 7
- Apoio das diferentes administracións _____ 7
