A Selección Galega de Ciclocrós, coa ciclista Laura Mira nas súas filas, acudirá á Copa do Mundo 2021-2022 que se celebrará o 16 de xaneiro na localidade francesa de Flamanville.
Xunto á deportista júnior, o tamén júnior Ricardo Buba e o sub23 Miguel Rodríguez estarán na liña de saída da UCI Cyclo-Cross World Cup.
Tal e como apunta a Federación Galega de Ciclismo, a rexión da Baixa Normandía recibe esta fin de semana aos mellores especialistas do planeta na modalidade invernal do ciclismo. O programa de carreiras da décimo cuarta xornada da Copa do Mundo arrancará o domingo ás 09:30 horas coa competición júnior masculina, a continuación celebrarase a proba xuvenil feminina (10:30 h.) e a quenda dos sub23 chegará ao mediodía (12:00 h.).
O certame da Unión Ciclista Internacional comezou o 10 de outubro en Waterloo (Estados Unidos) e concluirá o 23 de xaneiro en Hoogerheide (Países Baixos).
Primeira proba da Copa do Mundo para Mira e os galegos
Ningún ciclista galego participou no que vai de temporada nunha cita da Copa do Mundo, pero o trío convocado polo seleccionador autonómico Alberto del Río para viaxar a Flamanville xa desfrutou esta campaña dunha experiencia internacional. Os tres formaron parte do equipo que representou a España no Campionato de Europa celebrado a principios de novembro en Drenthe (Países Baíxos).
Aos éxitos obtidos en Galicia, adxudicándose tanto a xeral da Copa como o Campionato nas súas categorías, engadiron a pasada fin de semana as medallas do Campionato de España. A pontevedresa Mira, corredora do Supermercados Froiz, fíxose coa prata júnior.
O gondomareño Buba, ciclista do Coruxo, colgouse o ouro xuvenil en Xàtiva e o ponteareán Miguel Rodríguez, tamén do Supermercados Froiz, acadou o bronce sub23, categoría na que esta temporada triunfou na xeral final da Copa de España.
