A contorna da cidade deportiva de Riazor e as praias de Riazor e Orzán acolleron este domingo a edición número 38 do Día do Deporte na Rúa, unha iniciativa municipal coa que o Concello da Coruña busca promover e incentivar a actividade que desenvolven as entidades deportivas da cidade. Este ano bateuse o récord de participación, con 93 entidades e clubs participantes nun total de 63 modalidades.
“Desde o Concello da Coruña buscamos o fomento do deporte a todas as idades e, por iso, traballamos da man de moitas asociacións e clubs que hoxe amosan á cidadanía, nun acto multitudinario e en aberto, todo o seu potencial”, indica Manuel Vázquez, concelleiro de Deportes. Todas as actividades celebradas hoxe estiveron abertas a toda a cidadanía. Ademais, houbo sorteos de agasallos e eventos especiais.
🏐 A praia do Orzán xa se prepara para celebrar o Día do Deporte na Rúa!
🏄♀️ O Coruña Beach Club, a Federación Galega de Surf, @pradosurfescola e o @CVZalaeta xa están quentando motores. pic.twitter.com/x0CwT0PnkE
— A Coruña Deportes (@coruna_deportes) June 15, 2025
A cita chega á 38 edición
O Concello da Coruña celebrou este domingo 15 de xuño o XXXVIII Día do Deporte na Rúa como colofón á actividade das Escolas Deportivas Municipais no curso 2024-2025. Nesta ocasión houbo un total de 93 entidades participantes e 63 modalidades deportivas, o que supón o récord desta celebración. Toda a información e o mapa interactivo con todas as disciplinas poden ser consultadas na seguinte ligazón.
Todas as actividades se desenvolveron de 11.00 a 14.00 horas na contorna da Cidade Deportiva de Riazor. Os deportes náuticos terán nas praias de Riazor e Orzán. Todas as actividades son de balde e abertas a todas as idades. A cita promovida polo Concello da Coruña ten como obxectivo promocionar as diferentes disciplinas deportivas que se practican na cidade, da man dos distintos clubs e entidades deportivas municipais, e dun xeito lúdico e participativo, achegar á cidadanía os beneficios da práctica deportiva.
O Día do Deporte na Rúa contou este ano con 63 modalidades deportivas diferentes dende o atletismo, baloncesto, bádminton, boxeo, ximnasia, escalada, marcha nórdica ou xadrez. Tamén haberá deportes náuticos como vela, piragüismo, waterpolo, paddlesurf ou surf entre moitas outras.
Como novidades contouse con danza urbana, pickleball, pelota vasca e pentatlon militar. Ademais, celebraranse diferentes actividades dirixidas por técnicos/as especializados/as de Termaria cos seguintes horarios: Body Balance ás 11.00, zumba ás 12.00 e Salsation ás 13.00 horas.
Ademais, este ano houbo no evento un total de seis parasurfistas internacionais na zona dedicada ao surf na praia do Orzán, máis axeitada para estas prácticas deportivas pola calidade das súas ondas. Estiveron encabezados por Daniel Souto, parasurfista coruñés.
Outra das actividades destacadas este ano foi o pentalón militar, que contará cunha pista de aplicación adaptada. Ademais, haberá dous talleres de RCP e salvamento acuático.
Este ano, 93 clubs e entidades deportivas da cidade se sumaron á celebración do Día do Deporte na Rúa, colaborando co Concello da Coruña co obxectivo de dar a coñecer as diferentes prácticas deportivas que se ofertan no municipio, completando unha programación deportiva ampla e diversa.
Deste xeito, o Concello da Coruña explica que “mantén o seu apoio ao sector deportivo da cidade, achegando o seu traballo á cidadanía, e fomentando a práctica deportiva para todos os gustos e idades”.
Agasallos no Día do Deporte na rúa
A participación no XXVIII Día do Deporte na Rúa era libre e sen necesidade de inscrición previa. Hoxe domingo repartíase unha tarxeta de participación en cada unha das actividades deportivas ou no punto de encontro do Palacio dos Deportes. En cada tarxeta había tres marcadores para selar e en cada actividade que se realice poderase cubrir un.
Houbo 2.000 camisetas que se entregaron ás 2.000 primeiras persoas que conseguiron un selo na súa tarxeta. Ademais, houbo un sorteo de materiais das entidades colaboradoras. Participaron todas as persoas que depositaron as súas tarxetas cubertas con tres selos.
