O concelleiro de Deportes, Manuel Vázquez, asistiu hoxe aos actos programados no XXXVII Día do Deporte na Rúa, a gran festa anual do deporte coruñés. Ao longo da mañá, milleiros de persoas participaron nas actividades previstas, organizadas de forma conxunta entre o Concello da Coruña máis de 80 entidades deportivas e sociais da cidade.
bpuxo en valor precisamente este traballo de colaboración entre o Concello da Coruña e o tecido asociativo, “que dá os seus froitos en xornadas como a de hoxe, na que a cidadanía gozou de máis de 60 disciplinas deportivas, achegando tanto a adultos como a pequenos a deportes como a escalada e a marcha nórdica, entre moitos outros”.
Ao igual que en edicións anteriores, o Día do Deporte na Rúa desenvolveuse ao aire libre, en espazos habilitados entre Riazor e o Orzán. Entre as 11.00 e 14.00 horas, puntos como a explanada do Palacio dos Deportes e a rúa Manuel Murguía foron o punto de encontro de persoas de todas a idades, que participaron nos xogos e actividades ofertadas.
O concelleiro tamén destacou a importancia que ten o Día do Deporte na Rúa “á hora de visibilizar o traballo dos clubs e entidades da cidade”, dando a coñecer moitas disciplinas deportivas “que anteriormente tiñan menos tradición na cidade ou quizais eran consideradas minoritarias, e, co paso do tempo, foron gañando persoas seguidoras, socias e afeccionadas”.
