O BAXI Ferrol ten unha nova peza para a próxima tempada en LF Endesa. O equipo universitario incorpora ás súas filas á escolta serbia Milica Ivanovic, quen chega á cidade departamental asegurando que “me ilusiona moito o seu proxecto. É un sitio que aposta por medrar e cun gran corpo técnico”.
A xogadora, de 32 anos, conta cunha ampla experiencia. A serbia participou en ligas como a de Serbia, Romanía, Alemaña, Portugal e Suíza e xa coñece a competición española, onde xogou co Campus Promete e o Lointek Gernika, do que chega procedente a Ferrol. Na súa formación tamén se atopa unha experiencia na liga universitaria estadounidense.
Ivanovic admitiu na súa presentación que non dubidou en aceptar a oferta xa que tiña boas referencias do BAXI Ferrol, polo que “teño moitas ganas de vivilo”. De cara a vindeira tempada na máxima categoría, a escolta asegura que “aínda que o BAXI sexa un equipo recentemente ascendido, é un club con historia na liga. Afrontamos con moita ilusión esta nova tempada, na que buscaremos consolidarnos na categoría”.
Milica Ivanovic: “Poderei aportar experiencia ao equipo e puntos desde o perímetro, ademais de versatilidade”
No plano individual, a baloncestita explica que se identifica co “xogo alegre e rápido con defensas agresivas” que caracteriza ao combinado galego. Segundo ela mesma apunta, “poderei aportar experiencia ao equipo e puntos desde o perímetro, ademais de versatilidade”.
Mensaxe de Ivanovic á afección
A nova fichaxe do club universitario quixo enviarlle unha mensaxe á que será a súa nova afección: “Oxalá esta tempada podamos ver A Malata chea e volver a sentir esa marabillosa afección. Espérovos con moitas ganas para poder desfrutar xuntos dunha gran experiencia”, declarou Ivanovic.
Mucho tiempo queriendo decir esto: el BAXI Ferrol contara está temporada con…#SienteElUni pic.twitter.com/CHrOksgQSt
— Baxi Ferrol (@UniFerrol) May 24, 2021
Esta xogadora é a sétima confirmada polo equipo da cidade departamental cara o curso 2021/2022, despois das renovacións de Jenna Allen, Natalia Rodríguez, Patri Cabrera, Suné Swart e Dynn Leaupepe, así como a fichaxe de Carmen Grande.
