Análise e propósito de enmenda é o que se desprende das palabras de Miguel Llorente. O técnico do Dépor ABANCA é consciente de que a situación na que derivou o equipo que prepara esta tempada non era a desexada: “Terémonos que sentar para ver que pasou, que fagas unha primeira volta tan boa e unha segunda tan mala. Non tiñamos que estar a xogar o partido de hoxe e case seguro que son eu o principal responsable”, declaraba ao final do partido ante o Real Unión Tenerife Tacuense. O partido deu a permanencia ás coruñesas na Liga Reto Iberdrola, pero tiveron que loitar por non baixar ata o último partido, cando o obxectivo da tempada era ascender e regresar á elite.
Miguel Llorente, técnico do Dépor ABANCA, recoñeceu tralo partido en ABANCA Riazor co conxunto tinerfeño que “nos xogabamos moitísimo. Ao principio vin que a diferenza existía e saíron elas como saíron. Pero estaba a desexar o minuto 93. Fíxoseme eterno o día de hoxe. Sufrín moito pero cando o vexa en frío imaxínome que fomos moi mandonas e tivemos o partido controlado en todo momento”.
Percibiu no vestiario branquiazul “moito alivio, moito choro pola presión de como foi a temporada. Cando te metes é totalmente xusto. Se te metes neste playout é porque fixeches moitas cousas mal. Acábasche salvando e o que eu vivín con elas é un alivio de saber que fixemos un bo partido, demostramos que non tiñamos que estar onde estabamos pero vímonos neste día”.
Desvela que na segunda parte “sufrín máis pero non polo gol (do Real Unión de Tenerife) senón porque vía cada vez máis preto o que levabamos buscando durante moito tempo pero na primeira gocei como un anano. Practicamente non abrín a boca. É o que sempre ansiei cos meus equipos. O adestrador ten que ser prescindible e en ABANCA Riazor é máis efectivo porque nin se che escoita. O orgullo de ver como xogou o equipo é o que máis me emociona e o que máis me enche de alegría”.
O adestrador branquiazul Miguel Llorente viuse realmente salvado cando o árbitro pitou o final do partido: “As xogadoras dicíanme que non querían que se acabase o partido. Leveime a palma de pasalo mal. Non o vin seguro ata que terminou o partido”.
Sobre a afección que abarrotou a Tribuna Inferior do Estadio Municipal ABANCA Riazor en apoi a As Nosas deportivistas, apuntaba o adestrador das futbolistas herculinas que “é outra historia. Estiveron en todo momento animando e se o equipo estivo ben, ‘a nosa forza’ estivo de once sobre dez. Despois de que houbese un mínimo de dúbidas respecto de nós, encargouse de despexalas e leváronnos polo aire”.
Seguirá Miguel Llorente no Dépor ABANCA?
Consultado polo seu futuro, Miguel Llorente insiste en que “aquí estiven moi ben. Desde o primeiro día tratóuseme moi ben. Foi unha temporada moi difícil. Terémonos que sentar para ver que pasou, que fagas unha primeira volta tan boa e unha segunda tan mala. Non tiñamos que estar a xogar o partido de hoxe e case seguro que son eu o principal responsable. Espero sentarme co Club e avaliar que pasou principalmente para que non volva pasar, non sei se xuntos ou separados. Non pode volver pasar nin a min como adestrador nin ao Dépor como Club”.
Insistiu o técnico branquiazul en que no Dépor ABANCA “están a facerse as cousas ben e nun Club que se están facendo as cousas ben, con certo sentido e con cabeza, a miña idea é continuar. Hai que ver a idea que ten o club. É unha temporada anómala, difícil e que hai que sacar conclusións”.
