O técnico do Dépor ABANCA, Miguel Llorente, advertiu na sala de prensa de Abegondo na previa do partido ante o CDF Osasuna, que enfronte terán a “un equipo dos máis difíciles da categoría porque teñen experiencia, estivo a piques de subir a Primeira varios anos”. Pero o adestrador considera que o bloque que adestra evoluciona e mellora día a día “somos mellores que onte e peores que mañá”, explicab.
O encontro do RC Deportivo ABANCA e o CDF Osasuna da Liga Reto Iberdrola está fixado para o domingo 6 de febreiro ás 12:00 na Cidade deportiva de Abegondo.
Explicaba Miguel Llorente antes os medios ao respcto do rival que son “un equipo forte que a súa proposta, se non estás ben, pódeche amolar moito porque é un xogo moi directo, moi baseado no físico. É o que nos esperamos delas. O outro dicía Carlos Rosende (secretario técnico do club) que un equipo é un organismo vivo, entón súbome ao carro desa apreciación e desa afirmación e ademais digo que é un organismo vivo que aprende só. Entón hoxe somos mellores que onte, somos peores que mañá, pero hoxe somos mellores que onte”.
No seu razonamento, Miguel Llorente argumentaba que as branquiazuis terán enfronte ao CDF Osasuna “sendo mellores, adestrando máis, coñecéndonos mellor… Por tanto o noso xogo seguro que vai ser mellor que o que fixemos na ida (resolto con empate a dous goles). Afrontamos o partido con moita seguridade, con moitas ganas de xogalo, sabendo o que nos xogamos en cada partido e pensando no obxectivo final”.
Llorente admite que o partido de ida co CDF Osasuna “non foi un bo partido”
Lembraba Miguel Llorente que o partido ante as osasunistas alá “non foi un bo partido. No momento non paréceche tan malo porque non foi malo, pero non foi bo porque ían catro xornadas, o equipo é novo… Déixasche alí un empate pero entraba dentro do previsto. No punto que estamos agora, se ves o partido que fixemos a primeira volta, estamos moitísimo mellor do que estabamos”.
Vaticina na Cidade Deportiva branquiazul “un partido bastante disputado, pero chegamos en mellores condicións que fixemos na primeira volta, que concedemos moito á hora de lanzar. Cando iamos por diante no marcador puxémonos máis nerviosas do que tocaba. Canto máis lances, máis rápido vólveche e de aí veu o empate nos últimos minutos. Imos estar tranquilas, acougadas. Seguimos confiando moito no noso. A formulación do CDF Osasuna é importante, pero como dixen sempre se facemos o noso, deberíanos dar o mesmo como che presionen, como se sitúen, porque temos que xestionar esa incerteza do xogo”.
O público “chave do ascenso”
De novo pensando na afición coruñesa, A Nosa Forza, Miguel Llorente quixo lanzar unha mensaxe de tranquilidade: “Moitas veces escoito ao público que mesmo o chega a pasar até mal porque non están afeitos ver un xogo que chegan a considerar de risco. Quero mandarlles unha mensaxe desde aquí que estean tranquilos”.
Explicaba o adestrador branquiazul que cando vía “os partidos gravados sufro por eles porque están a desexar que gañemos, pero nese desexo chegan a pasalo mal e non é o obxectivo. O obxectivo é que veñan e gocen, que saiban que o temos controlado, que está adestrado e que o que facemos non o facemos cos ollos pechados, senón que sabemos o que estamos a facer”.
Propón o técnico das galegas que o público acuda a ver ao Dépor ABANCA pensando en “gozar, a vibrar como vibraron os últimos partidos. Esperamos un Abegondo absolutamente cheo até onde se poida porque saben perfectamente que van ser clave no ascenso. Así que esperamos que veña todo o mundo e de verdade que veñan con ganas de gozar, que o que facemos facémolo con convicción e sabendo o que estamos a facer”.
A importancia do traballo diario coas xogadoras do Dépor ABANCA B
Cualifica de “importante” o feito de que adestren diariamente futbolistas do Deportivo ABANCA B: “Imos tentando que vaian vindo xogadoras para que se vaian aos poucos impregnando desta idea diferente, quizais non tan diferente con outros equipos, pero si diferente. Entón que aos poucos vaian entendendo este idioma e vaian practicando este idioma ademais do que practican e aprenden elas. Teño moi en conta quen vai vindo, cando e porqué vai vindo, porque é importante que ese ecosistema ou ese organismo vivo mantéñase estable. Non creo que sexa bo moitos cambios, moitas xogadoras diferentes cada día. Temos que ser estables, persistentes e consistentes no noso día a día”.
“Interésame moito que sigan vindo”, confirma Miguel Llorente, “porque de cando en vez podo pasarme polos adestramentos e podo velas, pero non é o mesmo velas co seu equipo que connosco. O noso obxectivo é ver a todas as que podamos e en función diso, vendo as que mellor se adapten ao noso idioma, que poidan seguir vindo adestrar e que veñan gozar, a aprender e a xogar connosco”, explicaba o técnico do primeiro equipo.
#ASNOSAS convocados para a 17ª xornada de #RetoIberdrola, o #DéporABANCAOsasunaFem de maña ás 12:00 h. na Cidade Deportiva de Abegondo pic.twitter.com/1rgVnzJ1tI
— RC Deportivo (@RCDeportivo) February 5, 2022
Finalmente, preguntado polo mercado de fichaxes que se pechou este pasado luns sen novidades, o adestrador branquiazul. Miguel LLorente, admite que “tivemos idea de reforzar pero como xa dixen no seu momento non era unha idea principal, á desesperada. O que buscamos non o atopamos porque era difícil e xa está. Por tanto, decidimos non reforzarnos porque estamos totalmente equilibradas e cun cadro bastante completo”.
Kakun Mainz: “Para nós son moi importantes os puntos, precisámolos e imos ir a morte polo partido”
