O Dépor ABANCA de Miguel Llorente tivo o seu primeiro test como equipo en Riazor, disputando o Trofeo Teresa Herrera co portugués Valadares Gaia. Cun 0-0, o torneo resolveuse na tanda de penaltis, con vitoria para as lusas.
Malia a derrota final, o novo técnico asegura que “a actitude é de 10. Para levar semana e media creo que xa se ven certas cousas e certas intencións conxuntas”.
Llorente admitiu que ten unha sensación “un pouco negativa porque ao final sei que para o club é importante este torneo e cando se escapa nos penaltis, cando tiveches o control absoluto do partido, tiveches as ocasións, puxiches o xogo e a intención e se escapa nos penaltis desta maneira, é feo. Pero estou moi contento a verdade”, apunta.
Miguel Llorente: “Foi unha aprendizaxe enorme que é do que se trataba”
En liñas xerais o adestrador branquiazul resume o encontro nun “bo partido. Atoparemos moitos destes ao longo da tempada e foi unha aprendizaxe enorme que é do que se trataba”.
Un fútbol centrado na posesión de balón
O preparador, con pasado blaugrana, asegura que o fútbol que busca nas súas xogadoras e que “espero que vexamos ao longo da tempada”, centrarase en “ter un punto de pausa á hora de xogar, que non haxa precipitación, porque en función diso poderemos decidir moito mellor”.
Pero por riba diso, está a posesión de balón: “Sobre todo, e é algo que espero que vexamos ao longo da tempada é que queremos ter o balón o 98% do tempo. Para iso hai que ter unha intención conxunta en canto a que se perde saltar e recuperar. Creo que iso se viu claramente pese a ser o primeiro partido e con iso me quedo”.
Para Miguel Llorente o conxunto está onde debe de estar a estas alturas da recentemente iniciada pretempada. “Estou, non sorprendido, porque xa comentei na rolda de prensa de inicio de pretempada que atopei a un equipo con moitas ganas de empezar e facer as cousas ben e a semana e media que estivemos adestrando eu xa estiven encantado con elas e creo que está no punto no que temos que estar. A lástima é o resultado, pero creo que é máis importante o como que o que”.
De estrea en Riazor
Este debut de Llorente como adestrador deportivistas e o novo plantel tivo un escenario perfecto. O céspede de Riazor acolleu ao novo Dépor ABANCA, un “templo”, en palabras do técnico: “Cando chegamos e o vin, para min é un templo da liga española e do fútbol en xeral. Estrearmos ou estrearme aquí é un soño feito realidade. A todo o mundo lle gusta xogar en campos así e hoxe puiden cumprir un soño deste calibre”.
Miguel Llorente: “A todo o mundo lle gusta xogar en campos así e hoxe puiden cumprir un soño deste calibre”
A protagonista do partido: María Ruíz
A Torre de Hércules á mellor xogadora do Teresa Herrera foi nesta edición para María Ruíz. Unha xogadora moi valorada polo seu técnico, quen afirmou que “me gusta o seu perfil porque ten moitísimas ganas e é rueira. Iso a min me gusta. Ten ganas, ten ambición, vimos o golpeo que pegou de falta, que eu avisei desde o banco, atención a María, e que lástima que non entrara. Gústame moito e creo que esta tempada daranos grandes resultados e grandes alegrías”.
No relativo ao resto do plantel, Miguel Llorente non confirma se está pechado, pero si asegura que está equilibrado. “Consideramos que o plantel podería estar pechado, iso non quita que non poida haber cambios de última hora, pero de momento está equilibrada, iso seguro. Iso é o que nos interesa”, rematou.
