A porteira andaluza Meriem Ezbida non continuará a próxima tempada nas filas do Mecalia Atlético Guardés, tras formar parte do equipo da Liga Guerreras durante dous anos.
Desde o club galego quixeron agradecerlle o seu traballo, esforzo e implicación desde o primeiro día que puxo un pé na Sangriña e desearonlle, de corazón, toda a sorte do mundo nos seus futuros proxectos.
Estas foron as bonitas palabras de despedida que Meriem trasladou ao Atlético Guardés.
“Que sorte teño de ter algo do que me custe tanto despedirme”
Collo a frase prestada porque non me imaxino mellor forma de empezar. Vou seguir poñéndome sentimental, como é propio en min, para comparar ao Guardés co meu amor platónico dos equipos de balonmán. Sempre che admirei e soñei con xogar no teu pavillón. Así que cando tiven a oportunidade de que se fixese realidade só penseimo unha vez, porque á segunda xa estaba a lle dicir a Prades que si. Coa ilusión e a paixón dunha recentemente chegada que mantiven intacta durante dúas tempadas.
Déchesme tantas cousas. Vivín dous vestiarios marabillosos, con cada compañeira que pasou a ser amiga e levo sempre comigo. Dísteme Europa, déchesme soños, remontadas imposibles. Déchesme a vertixe de verche o número 1 na clasificación. Déchesme a mellor afección do mundo e sentir que xogabamos con 8 en casa. Déchesme un pobo e a sensación de fogar. Déchesme viaxes interminables e mil anécdotas para contar. A cambio eu sempre din o mellor de min, ou iso tentei. A ilusión dunha novata, o 120% de implicación e compromiso. Deiche o sentimento de amor polas túas cores e namoreime da túa terra e da súa xente.
Así que agora vexo que sempre foi un amor correspondido. E que como nas mellores historias, vou sendo mellor grazas a todo o que nos demos.
Infinitas grazas. E que nos volvamos a atopar.
