Despois de dous anos de parón por mor da pandemia, a Copa Galicia de Descenso regresou no que esta temporada vai ser o seu escenario de referencia. O Bike Park da estación de montaña ourensá de Manzaneda acolleu o II Trofeo Federación DHI, no que a asturiana Cristina Menéndez, do Cuetos Bike, acadou o mellor tempo.
No día da proba o tempo acompañou ás e aos deportistas, nunha cita que tamén repartía puntos para o ranking estatal. O día foi solleiro, nada que ver co acontecido o pasado mes de novembro na primeira edición do evento organizado conxuntamente pola Federación Ciclismo Galego (FCG) e a Estación de Montaña de Manzaneda. Grazas ao traballo técnico do staff do Manzaneda Bike Park, as corredoras e os corredores puideron desfrutar, e ao mesmo tempo padecer, o circuíto ‘Cabra Calavera’.
Segundo recolle a Federación Galega de Ciclismo, o percorrido no que se celebraron as quendas clasificatoria e final presenta un importante compoñente físico. Pedalear é obrigatorio tanto no treito inicial como no final, unha esixencia superior á da maioría de probas de DH e que provocou que unha parte dos riders chegaran sen folgos á liña de meta.
Raíña de Manzaneda na Copa Galicia de Descenso
A mesma rider que triunfara na primeira edición do Trofeo Federación DHI Manzaneda BikePark repetiu éxito seis meses despois. A júnior Cristina Menéndez volveu cumprir cos prognósticos, desta vez cun ‘crono’ de 3:49.957 nesta xornada da Copa Galicia de Descenso. A asturiana do Cuetos Bike bateu por 15” a Eva Castro (CiclosQuintena), primeira líder elite da Copa, e terceira rematou a tamén elite Covadonga González (Cuetos Bike), a 24” da súa compañeira de equipo e filla.
A camisola da categoría sub23 recibiuna Uxía Álvarez (Coruxo), a menos dun segundo de entrar no top-3 absoluto, e a quinta praza correspondeu a Gemma Chapela (VK Bikes), terceira nas elites. En canto ás infantís, Nayra Giráldez (Monteboi) recolleu o premio como gañadora.
A cerimonia de podio da Copa Galicia de Descenso contou coa presenza de Víctor Picos, director da Estación de Montaña; Miguel Sierra, tenente alcalde do Concello da Pobra de Trives; Clemente Pérez, responsable da Agrupación de Protección Civil de Manzaneda; e José Antonio Guerra e Juan González, voluntarios de Protección Civil de Manzaneda. Esteban Lorenzo, director do evento e directivo da FCG, encargouse de impoñer os maillots da Copa. A organización agradece especialmente a colaboración dos voluntarios de Protección Civil de Manzaneda e da Pobra de Trives, así como dos membros do Maese Riders Team.
A Copa Galicia de Descenso volverá a escena o 5 de xuño no Páramo co VI Descenso DhgTeam e a seguinte cita co DHI en Manzaneda chegará o 10 de xullo no Campionato de Galicia.
