O actual líder da Copa de España impuxo a súa lei este domingo na apertura da Copa Galicia de Enduro na cita de Monte Castelo en Burela. O elite Marco Veiga (Ciclos Quintena) asinou o mellor rexistro scratch nos catro treitos cronometrados que se disputaron no Monte Castelo, onde a sub23 asturiana Cristina Menéndez (Cuetos Bike) dominou na competicion feminina.
A cita organizada polo club Cerezo Bikes serviu como último ensaio antes de que a vindeira fin de semana se celebre o Campionato de España en Puntallana (Tenerife), tal e como apunta a Federación Galega de Ciclismo (FCG).
A terceira edición do evento burelao reuniu a uns 120 riders e resultou espectacular tanto polo nivel dos participantes como pola masiva presenza de público, sobre todo, no treito urbano da competición. O percorrido de 25 quilómetros, no que se acumulaban 1.450 metros de desnivel positivo, puxo en xogo as primeiras camisolas de líderes da Copa Galicia 2023, o certame coordinado pola Federación Ciclismo Galego e que esta temporada consta de tres probas puntuables.
Menéndez, á fronte da clasificación en Monte Castelo
A competición feminina do Enduro Monte Castelo rexistrou un duelo fraticida entre as irmás asturianas Menéndez González. A sub23 Cristina foi a máis rápida en tres treitos e dobregou no tempo final acumulado por 7″ á júnior Natalia (Cuetos Bike). A arteixá Alba Arias (Ciclos Quintena) fíxose coa terceira praza e co triunfo elite.
Ao marxe da Copa Galicia, na proba de e-bikes subiron ao máis alto do podio Daniel Quintana (Las Brañas y el Mar) e Estefanía Cabarcos (Rocasport).
O naronés Marco Veiga amosouse intocable dende o primeiro dos catro TC. En tres deses parciais a segunda praza obtívoa o sub23 David Fernández (Avanza-O Porriño), que deste xeito acadou o seu primeiro podio absoluto. Os dous primeiros clasificados na táboa scratch remataron separados por 11 segundos. Máis igualado estivo o duelo pola terceira praza cos elites Nicolás Carrera (Coruxo) e Mauro González (Salvaterra) a 23 segundos do gañador, decantándose o pulso a prol do representante da formación viguesa por 530 milésimas.
A quinta posición correspondeu ao elite Kevin Méndez (Rocasport) e dentro do top-10 concluíron o vencedor máster-30 Santos Lemos (Grupeta Pan de Zarko), sexto na clasificación absoluta, e o primeiro máster-40 José Manuel López Vaqueiro (Cerdedo-Cotobade), oitavo. No resto de categorías da Copa Galicia as camisolas de líderes teñen como primeiros propietarios a Yerai Peláez (Coruxo) nos cadetes, a Hugo-Rosendo (Cerdedo-Cotobade) nos juniors e a Marcos Araújo (MR Bikes) nos máster-50.
A próxima xornada do certame autonómico de Enduro chegará o 21 de maio no IV Enduro das Rosquillas ADC Picaraña- Biziebike en Ponteareas.
