O Campionato de España sub23 de aire libre celebra a vindeira fin de semana a súa 36ª edición na localidade alicantina de Nerja na que participarán ata 21 atletas galegas da Federación de entre o total de 613 inscritos.
Entre as galegas participantes destacan nomes como Adi Iglesias, campioa de Europa, Lucía Ribadulla, cuarta no último nacional sub20, Uxía Paz, quen vén de lograr a súa MMP na última xornada de Liga, Ivanna Carolina Román subcampioa nacional, Eva Queimaño, vencedora sub23 ou Antía Chamosa, favorita da súa proba.
A velocidade das galegas
No sector de velocidade a gran protagonista será Adiaratou Iglesias, do Lucus Caixa Rural. A atleta vén de proclamarse campioa de Europa nos 100 m. e nos 400 nm. e nesta edición do Campionato sub23 intentará mellorar os bronces acadados no nacional do ano pasado.
Na distancia dos 800 m., Raquel Meaños acude na oitava mellor marca das participantes, tendo como principal obxectivo rematar por debaixo dos 2:12. Pola súa parte, Lucía Ribadulla, do Ría Ferrol, tomará a saída nos 400 valos na procura de rebaixar o súa MMT de 1:01.63 e mellorar o cuarto posto acadado no seu último nacional Sub20.
Os saltos
No concurso do triplo salto, Uxía Paz, do Atletismo Feminino Celta, vén de lograr a súa MMP na última xornada da Liga Iberdrola de clubs, cun 12.22 m. que a sitúa na loita por un posto no podio. Na proba de lonxitude, Olaia Guisela Becerril, do equipo celeste e recentemente chegada dos EUA, competirá por mellorar a segunda posición que obtivo na edición do 2019, cando fóra subcampioa nacional sub20.
💪💪Moita sorte ás nosas atletas quenes estarán a competir esta fin de semana no Campionato Nacional Sub 23 en Nerja💪💪 pic.twitter.com/OPJ0Kozny2
— Atletismo Galego (@atletismogalego) June 17, 2021
Os concursos de lanzamentos
Nos lanzamentos, María Ezquerro, do CA Sada, buscará os postos da final coa súa marca de 39.96 m. En xavelina, destaca a presenza da subcampioa nacional Ivanna Carolina Román, do Ría Ferrol, quen parte como favorita grazas aos seus case 49 metros. Na mesma proba, Andrea González, do SG Pontevedra, loitará por postos de podio.
Pola súa parte, Claudia Puig da Gimnástica, Andrea Botella do C.A. Santiago e Uxía Sureda do Lucus Caixa Rural, completan o elenco de lanzadoras galegas nesta final.
Combinadas e marcha
Por último, na competición de probas combinadas a galega do Super Amara, Eva Queimaño, participa defendendo o seu título nacional de campioa de España sub23. Na proba de marcha, a atleta internacional e campioa de España absoluta, Antía Chamosa, da SG Pontevedra, parte como clara favorita, co obxectivo de superar o subcampionato que logrou na edición do 2020 en Sevilla.
