Quilómetros no lombo e un 3+3 como obxectivo para as xogadoras do HC Borbolla que esta fin de semana fai unha tourné en autobús de lado a lado da Península Ibérica. O motivo, son dous compromisos competitivos, un hoxe, venres 26 de marzo, na Ok Liga Prata co CPP Raspeig (20:00 horas), outro mañá, sábado 27 de marzo, na Ok Liga contra o Igualada Feminí HCP (tamén ás 20:00 horas).
Viaxan as tomatitas “Sen baixas”, como apunta o adestrador de ambos equipos, Santi Martínez, e coa mochila chea de ganas de sumar os puntos de tres en tres e traer de volta na maleta para A Coruña 6 puntos (tres en cada categoría).
Ver esta publicación en Instagram
A expedición do HC Borbolla saía onte xoves ás 22:00 h da Coruña e hoxe (venres) xa están en Raspeig (Alacant) onde á noite (20:00h) disputan o partido co conxunto local CPP Raspeig dentro da Ok Liga Prata feminina.
O partido será artibrado pola colexiada Gemma Bravo. “Ao facer o desprazamento de noite coido que se nos fixo máis levadeiro”, conta o adestrador de ambas as dúas escuadras, Santi Martínez.
O CPP Raspeig é colista. Non coñece a vitoria. Mentres, o HC Borbolla é cuarto clasificado cun partido disputado e gañado 1-7 ao Gatikako Iusturi, que será o rival nesta xornada do Deportivo HC Liceo, o outro equipo galego da categoría. O partido das liceístas será arbitrado por Íñigo Maestro.
Na escuadra alacantina teñen moita ilusión nesta participación na Ok Prata xa que é a primeira vez que un club feminino da comunidad valenciá disputa unha liga estatal de hoquei sobre patíns.
A terceira xornada da Ok Liga Prata conta cos seguintes cruces:
- 26/3/21 20:00 horas CPP Raspeig – HC Borbolla
- 27/3/21 18:30 horas Gatikako Iusturi – Deportivo HC Liceo
- 28/3/21 16:30 horas CP Alcorcón – UDC Rochapea
Ok Liga Feminina, obxectivo, salvación
Mañá, sábado 27 de marzo, en Igualada, as tomatitas recuperan o partido aprazado co conxunto local, o Igualada Feminí HCP. O encontro adiouse no seu día por casos de coronavirus no conxunto catalán. O cruce está previsto tamén para as 20:00 horas.
O HC Borbolla que adestra Santi Martínez ocupa a quinta praza no grupo pola permanencia na Ok Liga feminina. Precisa estar entre os tres primeiros equipos para evitar o descenso. O seu rival, o Igualada Feminí HCP, é xustamente o seu inmediato perseguidor. De vencer, as galegas poderían empatar a puntos co CP Vilanova (que agora ten un partido máis).
Dous partidos en 48 horas
Ademais de case 3.000 quilómetros en bus indo de punta a punta da Península Ibérica, as coruñesas de Monte Alto xogarán dous partidos de hoquei a patíns en tan só un espazo temporal de 48 horas.
É certo que a carga de minutos non será para todo o equipo, xa que aínda que comparten parte do plantel, na Ok Liga Prata non compiten as internacionais chilenas (Fernanda Muñoz e Fernanda Tapias), nin as xogadoras máis veteranas do club herculino. Na prata, a canteira ten aínda máis minutos e está demostrando o seu enorme potencial. Por exemplo, as irmás Yáñez (Lara e Lucía) ou a cancerbeira Edén Avecilla baixo paus, están a demostrar a súa gran curva de crecemento como xogadoras.
Na plantilla negra e vermella están tamén Alba Díaz, Antía Rivadas, Lola Rodríguez, Marta Vilas, Florencia e Valentina de Girolamo, así como Lucía Castro como porteira.
O dito, sen baixas e a por todas nos dous compromisos de diferentes categorías que teñen por diante é como acuden as tomatitas aos seus compromisos ligueiros nas Ok Ligas desta fin de semana.
O HC Liceo viaxa a Gipuzkoa para medirse ao Gatikako Iusturi
