Este sábado 12 de febreiro celebrarase a XVI edición da Copa Cidade da Coruña de Taekwondo no Coliseum da Coruña coa participación de 500 deportistas de Galicia, Madrid, Castela e León, Asturias, Cataluña, Andalucía, Baleares, Portugal, La Rioja, entre outro. Este torneo, que dará comezo ás 09:00 horas, regresa despois dun ano de parón obrigado pola pandemia.
A Copa Cidade da Coruña, organizada pola Escola de Taekwondo Garrapucho, disputarase na modalidade de combate en todas as categorías (máster, sénior, júnior, cadete, precadete e infantil) e para a celebración de todos os combates disporanse 8 tapices, haberá vídeo replay e sistema Daedo Gen II en todas as categorías. Os horarios serán de 9 a 14:30 horas e de 15:30 a 20:30 horas.
Como todos os anos, a Escola de Taekwondo Garrapucho organiza unha recollida de alimentos a favor da Cociña Económica da Coruña, con máis de 130 anos de historia. A entrada á Copa Cidade da Coruña será gratuíta, polo que a organización anima a todos os participantes no evento (deportistas, árbitros, técnicos e público) a doar alimentos non perecedoiros, que se entregarán a esta institución benéfica.
