O Concello da Coruña presentou unha nova edición da carreira C21, o medio maratón. Será a primeira proba destas características despois de dous anos de interrupción por mor da pandemia e tras o regreso das carreiras populares ás rúas, coas que o Goberno de Inés Rey busca incentivar a práctica do deporte na rúa.
A concelleira de Deportes, Mónica Martínez, foi a encargada de presentar as características desta carreira, que se celebrará o 13 de febreiro ás 9.30 horas. Tamén participou no acto Isidoro Hornillos, presidente de da Federación Galega de Atletismo, que explicaba que a carreira Coruña21 ten un circuíto rápido e atractivo. Hornillos salientou tamén o feito de que a competición sexa unha carreira inclusiva.
O percorrido está homologado pola Federación Galega de Atletismo. Será unha proba a unha soa volta, a diferenza das anteriores edicións, cando se percorría un circuíto a dúas voltas. Será a segunda vez, tras a edición do 2015, que a C21 se desenvolva nun único traxecto co obxectivo de mellorar aínda máis as características de rapidez tan propias desta proba, xa desde o seu nacemento o 21 de xuño do 2009.
📢 Mónica Martínez, concelleira de Deportes, resalta na presentación de #Coruña21 que a proba volve co “afán de asentarse entre os mellores medios maratóns nacionais” e lembra que por segunda vez na súa historia (anterior en 2015) celebrarase nun único traxecto#C21 pic.twitter.com/fA6jN0vXXj
— A Coruña Deportes (@coruna_deportes) February 1, 2022
A saída e a meta estarán situadas na zona do Obelisco, no Cantón Grande, onde hoxe se presentou a carreira. Do mesmo xeito que ocorreu na Coruña10, unha das novidades do circuíto será o seu paso polos peiraos do Porto, que este ano quedarán abertos á cidadanía para o seu uso e gozo. Ademais, tamén é novidade o paso da C21 pola céntrica rúa de San Andrés, en pleno proceso de transformación nun bulevar que gañará espazo peonil para os coruñeses e as coruñesas, e servirá de enlace entre o Porto e o Paseo Marítimo pola zona do Orzán e Riazor.
O trazado completarase co habitual percorrido que vai desde O Parrote ata a zona de Oza, ampliándose nesta ocasión cun tramo que seguirá a antiga beira do río corués de Monelos.
“O feito de que a maioría do percorrido se faga en paralelo en ámbolos sentidos propiciará que, aínda tratándose dunha volta única, os corredores vaian cruzándose constantemente con outros que van a distinto ritmo, o que servirá para compartir esforzos e ánimos para rematar finalmente no centro da cidade, desde o mesmo sitio do que partiron, o Obelisco”, apuntou a concelleira de Deportes, Mónica Martínez.
Neste sentido, sinalou Martínez, a Coruña 21, ao igual que as probas do circuíto Coruña Corre, aposta pola sostibilidade e a conservación da cidade e as súas rúas, polo que o Concello garante que o percorrido estará en perfecto estado durante e despois da celebración da carreira.
Ábrese una 2ª quenda de inscrición cando xa hai máis de 1.300 atletas
Ata o de agora, e tras pecharse o primeiro prazo de inscricións, hai máis de 1.300 persoas participantes confirmadas. Ábrese agora unha segunda quenda ata o 6 de febreiro cun custo de 30 euros e, posteriormente, un prazo extraordinario os días 7 e 8 de febreiro cun prezo de 40 euros.
A C21 repartirá 14.300 euros en premios entre os primeiros e as primeiras cinco clasificadas da proba, os tres primeiros atletas de orixe español, os tres mellores galegos e galegas, e os tres mellores tempos de coruñeses e coruñesas.
Ademais, haberá un premio especial de 1.000 euros para a persoa que consiga bater o récord da proba. A marca récord está fixada neste momento en 1 hora, 2 minutos e 30 segundos na categoría masculina e 1 hora, 11 minutos e 16 segundos na feminina.
