Torremolinos está a acoller estes días o Campionato de España Open Absoluto Astralpool P50 e o XXXVIII Campionato de España de Natación Júnior P50, con representación galega nas piscinas e tamén nos podios. Na primeira xornada de campionato as nadadoras Paula Otero, do CN Arteixo, e Carla Carrón, do CN Arzúa, subiron ao caixón.
Paula Otero proclamábase campiona de España no Open Absoluto en 800 libre (tamén primeira en categoría absoluto mozo) cun tempo de 8.34.90 batendo a súa mellor marca persoal. Con este resultado, a nadadora logrou a mínima para o Campionato de Europa e para o Mundial Absoluto.
Pola súa banda, Carla Carrón resultou campiona de España Júnior en 800 libre cun tempo de 8:40.09 batendo record de Campionato en Categoría Júnior e acadou un cuarto posto en Categoría Absoluta, con mellor marca persoal e mínima para o Campionato de Europa Júnior. A FEGAN destaca que aos 15 minutos de nadar os 800 conseguia a súa segunda medalla en 100 libre cun tempo de 57.45 quedando segunda en categoria Júnior.
Tamén competiu nos 800 libre do Open Absoluto María de Valdés do CN Liceo que conseguiu un 7º posto en categoría absoluta cun tempo de 8:47.09. Sofía Carballo de CN Ponteareas foi novena en 50 braza cun tempo de 32.90 sendo mellor marca galega de 16 anos.
Nesta primeira xornada, nos 100 costas Ana Cernadas do Fluvial de Lugo acadou a mellor marca galega de 18 anos con 1:04.23 quedando undécima. En 100 libres Iria Lemos do CN Ponteareas foi sétima en categoría júnior cun tempo de 58.40.
O campionato continúa ata o 13 de abril na piscina municipal Virgen del Carmen. Podes consultar aquí os resultados.
