- Mecalia Atlético Guardés imponse á Aula por un tanteo de 22-20 (11-9 ao descanso) no transcurso do Trofeo Festas do Monte da Guarda
O Mecalia Atlético Guardés iniciou con bo pé a súa pretemporada ao derrotar na Sangriña ao Caja Rural Aula de Valladolid (22-20, 11-9 ao descanso). Un triunfo traballado por parte do equipo local, que se sobrepuxo ás baixas para sacar adiante un encontro competido fronte a un sempre duro rival como é a escuadra castelá.
A primeira metade transcorreu igualada, con mínimas vantaxes para o conxunto que adestra José Ignacio Prades, que acelerou antes do descanso para alcanzar os dous tantos de diferenza (11-9).
Esta inercia proseguiu á volta dos vestiarios, cunha boa saída da escuadra miñota, que chegou a poñerse cinco arriba (16-11).
Co paso dos minutos, notáronse as ausencias no Mecalia
Foi entón cando se notaron as baixas -as tres incorporacións brasileiras están a completar a protocolaria corentena de dez días tras viaxar desde o seu país- e Sandra Santiago non puido xogar por lesión. Si estivo sobre a pista Paula Arcos, que gozou dos seus primeiros minutos con apenas un adestramento tras volver dos Xogos Olímpicos de Tokio, ademais de varias xuvenís.
O conxunto valisoletano apertou e chegouse a poñer a un tanto nos últimos minutos.Neses minutos candentes e tras varios tempos mortos, o Mecalia Atlético Guardés soubo xogar coa experiencia para manter a renda e mesmo aumentala ata o 22-20 final.
Tras esta pedra de toque co bo sabor de boca do triunfo, o equipo do Mecalia que prepara o técnico José Ignacio Prades empezará a preparar o SummerBAGExperience, que este ano se celebra en Valladolid con, precisamente, o Caja Rural Aula como organizador. Será o venres e o sábado da semana que vén.
