- Tentouno ata o final o Mecalia Atlético Guardés, pero as locais mostráronse moi acertadas cara á meta e a súa efectividad foi chave na súa vitoria final.
- O conxunto que adestra Abel González vaise ao parón do Nadal na novena praza.
- Santiago e Cifuentes, con 7 goles cada unha, foron as máximas anotadoras visitantes.
O Mecalia Atlético Guardés sucumbiu na pista de Zubileta Evolution Zuazo presa da efectividade no lanzamento do equipo local. Unha arrancada do conxunto vasco ao final do primeiro acto e outro mediado o segundo, deixou sen opcións de puntuar ás pupilas de Abel González, que continúan sen coñecer a vitoria a domicilio no que vai de curso e vanse ao parón na novena posición da táboa clasificatoria.
As xogadoras que adestra o técnico Abel González comezaron o partido concienciadas. Tanto, que apenas lles importou o 2-0 de saída co que comezou a escuadra local. Sen problema. A primeira liña luso-paraguaia púxose ao choio e comezou a producir da man de Patrícia Lima, Sandra Santiago e Pauli Fernández.
Pouco tardou en decatarse o equipo vasco do perigo e gañou profundidade no o seu 6:0 para anular ás internacionais do Mecalia Atlético Guardés. Pero se elas non poden, outras poderán. Apareceu entón unha conexión coa liña que resultou moi frutífera. Primeiro Carla Gómez e logo Cris Cifuentes atoparon os espazos ás costas das centrais e, con eles, os goles.
Así, o equipo miñoto alcanzou vantaxes de dous goles coas que transitou bastantes minutos. Así ata os últimos 10 do primeiro acto, aos que entrou tres arriba (10-13). O que sucede é que neste xogo todo cambia dun pestanexo para outro e Zubileta Evolution Zuazo reaccionou con forza.
O Atlético Guardés chegou ao descanso cun 16-15
O colectivo vizcaino veu arriba a base de axustar o seu defensa e atopar a finura de Sarrionandia e Bengoetxea en ataque. Así estableceu un demoledor parcial de 6-0, que puxo en xaque ao Mecalia Atlético Guardés. Pero, a falta de tres minutos para o descanso, produciuse unha exclusión (de Zaldua) que permitiu ás visitantes callar un parcial de 0-2 que levou o choque ao vestiario cunha distancia mínima entre ambos os contendentes (16-15).
Ao comezo do segundo acto, o Mecalia Atlético Guardés apertou para volver tomar vantaxes. E por momentos conseguiuno. Pero o equipo vizcaino mostrou unha altísima efectividade para portería. As lanzadoras locais mostráronse moi precisas nas súas acometidas e conseguían marcar con regularidade.
Desta forma, case imperceptiblemente, o equipo que adestra Joseba Rodríguez foise aos catro goles de vantaxe (27-23).
Tras un tempo morto, o equipo do Baixo Miño tentouno con ganas, pero a cada gol que facía, atopaba a resposta do Zubileta Evolution Zuazo. Desta forma, a desvantaxe non minguaba e o partido escorreuse entre os dedos para un Guardés que se vai ao parón do Nadal sen coñecer a vitoria a domicilio.
FICHA TÉCNICA
33) ZUBILETA EVOLUTION ZUAZO (16+17): Meriem Ezbida (p.); Estibaliz Velasco (1), Andrea Zaldua (2), Ariadna González, Estitxu Berasategui (2), Garoa Sarrionandia (8), Paula Molano, Sara Molés (1), Nerea Gil (1), Ane Valero (3), Maddi Bengoetxea (10), Andrea Samaniego, Izei Permach (1), Magdalena Fernández-Agustí (2) e Ixone García (2).
30) MECALIA ATLÉTICO GUARDÉS (15+15): Marisol Carratú (p.); África Sempere (1), Sandra Santiago (7), Giselle Menéndez, Ángela Nieto, Pauli Fernández (4), Míriam Sempere (p.), Cris Cifuentes (7), Patrícia Lima (6), Celia López, Elena Amores, Carla Gómez (2), María Sancha, e Daniela Moreno (3).
MARCADOR CADA CINCO MINUTOS: 2-2, 5-4, 7-9, 10-12, 15-13, 16-15 – descanso – 17-16, 20-18, 25-22, 27-24, 30-26 e 33-30.
EQUIPO ARBITRAL: Jorge e Jesús Escudero. Excluíron con dous minutos ás xogadoras locais Zaldua, Velasco, Bengoetxea e Fernández-Agustí, así como ás deportistas visitantes Celia López (2), Santiago, Cifuentes e Gómez.
INCIDENCIAS: Partido correspondente á décima xornada da Liga Guerreras Iberdrola da RFEBM, disputado no Polideportivo Lasesarre de Barakaldo (Vizkaya).
