- O equipo miñoto viuse superado polo cadro donostiarra (14-28, 7-11 ao descanso) na primeira semifinal do Summer BAG Experience.
- Debutaron as brasileiras Tamires Anselmo e Gabi Pessoa e as xuvenís Iria Pérez e Yaiza Alonso gozaron de minutos.
- Agora tócalles disputar o partido polo terceiro e cuarto posto contra o conxunto perdedor do cruce entre Aula-Gijón.
O Mecalia Atlético Guardés sufriu un severo revés sobre a pista do pavillón Huerta do Rey de Valladolid. O Super AmaraBera Bera, actual campión de Liga, impúxose con claridade ao equipo que prepara o técnico José Ignacio Prades na primeira semifinal do Summer BAG Experience (14-28, 7-11 ao descanso).
Un mal arranque da escuadra miñota condicionoulle demasiado. O equipo donostiarra estableceu un 5-0 de saída que lle fixo remar a favor de corrente durante todo o choque.
O Mecalia Atlético Guardés reaccionou ata o punto de reducir a tres a diferenza (5-8), o que obrigou ao conxunto vasco a pedir tempo morto. Desde entón, o marcador foi facendo a goma ata o 7-11 do descanso. Á volta do vestiario, o Super Amara Bera Bera acelerou de novo e esta vez, o equipo do Mecalia Atlético Guardés que prepara José Ignacio Prades non puido manter o tipo.
A consistencia defensiva que lle fixo sobrevivir na primeira metade diluíuse e o marcador disparouse. Ademais, a formación guardesa pagou o pato da pouca rotación ao dispor do adestrador –Sandra Santiago e Hannah Nunes non xogaron por senllos golpes-. Dese modo, o cadro de San Sebastián seguiu aumentando a vantaxe ata o 14-28 final.
Caras novas no Mecalia
A nota positiva do partido é que serviu para que, no Mecalia Atlético Guardés, Tamires Anselmo e Gabriela Pessoa debutasen con aproximadamente media hora para cada unha. Tamén participaron as xuvenís Yaiza Alonso (20 minutos) e Iria Pérez (15).
O Mecalia Atlético Guardés deberá agora disputar o partido polo terceiro e cuarto posto. Será mañá sábado 21 de agosto, contra o conxunto perdedor do cruce entre o Aula Alimentos e o Caja Rural Gijón.
