- Os afeccionados presentes e os que seguiron o evento por ‘streaming’ puideron ver aos seis novos fichaxes e a nova camiseta.
- Entregáronse os MVP da 19/20 ( Carratú) e da 20/21 (Arcos), ademais de obsequios a patrocinadores e a Julia Vaquero.
Coma se o tempo non pasase. Aí estaba o auditorio da praza de San Benito, dous anos despois, esperando para acoller de novo unha presentación do Mecalia Atlético Guardés. Cun aforo máis reducido, claro, porque a pandemia segue aí. Pero levándose a cabo.
Así, todas as xogadoras da entidade (e agora tamén xogadores coa creación do equipo masculino) pasaron polo escenario habilitado nunha festa contida e con todas as medidas de seguridade sanitaria pertinentes pola COVID. Tras a saída a escena dos equipos da base e do novo conxunto masculino de Segunda Autonómica, o primeiro plantel do Mecalia Atlético Guardés saíu a escena. Con elas tamén apareceu a nova camiseta desta tempada, que ten cor negra con detalles en amarelo.
Unha a unha, as xogadoras do Mecalia Atlético Guardés foron saíndo entre aplausos. En realidade, todas menos Carla Gómez, que non puido asistir ao evento. As últimas en subir ao estrado foron as seis caras novas do conxunto guardés para este curso 2021-22, é dicir, as xogadoras que se suman ao equipo adestrado, un ano máis por José Ignacio Prades: María Sancha, Nazaret Calzado, Ángela Nieto e as brasileiras Gabriela Pessoa, Tamires Anselmo e Deborah Nunes.
Prades, adestrador do Guardés: “O noso obxectivo é facervos gozar”
Despois foi a quenda dos discursos. Empezou o técnico do Mecalia Atlético Guardés, José Ignacio Prades, agradecendo a todo o mundo a súa presenza en San Benito e desexando volver ver A Sangriña a pleno rendemento. “O noso obxectivo é facervos gozar cada fin de semana”, entoou con sinceridade o técnico alacantino.
Agregaba na súa alocución José Ignacio Prades que considera que este curso 2021-22: “Vai ser unha tempada moi longa e moi dura, pero á vez, espero que moi bonita. Non prometemos nada pero ao mesmo tempo esixímonos o máximo”.
Carratú, capitá do Guardés: “O único que non negocia este equipo é a entrega”
Tras o técnico, foi a quenda de Marisol Carratú, que este ano asume o rol de primeira capitá tras a marcha de África Sempere. “O único que non negocia este equipo é a entrega”, destacou a gardameta arxentina, que agradeceu aos afeccionados o apoio do ano pasado aínda sen poder sentilo de primeira man no pavillón. “Sempre confiaron en nós cando había veces que non o faciamos nós mesmas”, explicou.
“Cada unha destas xogadoras esfórzase cada día para devolverlle a este pobo un pouquiño do que nos dá. É o compromiso que adquirimos o día que deixamos atrás aos nosos seres queridos por esta bendita tolemia que é o Guardés”, proclamou a deportista arxentina.
Jesús López: “Queremos que estas xogadoras sexan a imaxe na que se reflicta a base”
Para pechar o acto de presentación do Mecalia Atlético Guardés 2021-22, falou o presidente do club, Jesús López. O mandatario do conxunto galego destacou como “equipón” ao primeiro equipo tras recoñecer sentirse “emocionado” na súa primeira presentación como máximo dixente do club. “Sobre todo, queremos que estas xogadoras sexan a imaxe na que se reflictan estas pequenas campioas que temos diante, que forman a nosa base”, concluíu.
Antes, o club ofreceu distincións aos seus patrocinadores. Tamén outorgou os premios MVP da tempada pasada e da 2019/20, en suspenso pola pandemia.
Paula Arcos e Marisol Carratú, respectivamente, foron as xogadoras elixidas polo plantel do Mecalia Atlético Guardés, que vota anualmente estes galardóns. Ademais, o club da Guarda entregou un obsequio de recordo a Julia Vaquero, a mellor deportista da historia da localidade, que acudiu á cita e recibiu o caloroso aplauso e o saúdo de todos os seus veciños.
