- O equipo miñoto deixou en cinco goles ao asturiano nun segundo parcial de alto nivel defensivo (24-17, 11-12 ao descanso)
- Patrícia Lima, con seis goles, e María Sancha e Nazaret Calzado, con cinco, raiaron a gran nivel en ataque
O Mecalia Atlético Guardés quitouse o mal sabor de boca que lle produciu a súa avultada derrota do venres contra o Super Amara Bera Bera. 24 horas despois, as xogadoras que adestra José Ignacio Prades refixéronse e superaron ao Unicaja Gijón no Summer BAG Experience grazas, sobre todo, a un fantástico segundo tempo (24-17, 11-12 ao descanso).
No primeiro período, o duelo estivo igualado. É máis, foi o conxunto asturiano o que levou a voz cantante. Chegou mesmo a ter tres tantos de renda. Pero o Mecalia Atlético Guardés reaccionou a partir da arma favorita do seu adestrador: a defensa.
A pesar das importantes ausencias, o 6:0 empezou a funcionar ata recortar a vantaxe xixonesa á mínima expresión no descanso (11-12). Á volta dos vestiarios, o Mecalia Atlético Guardés deu un paso máis.
A engrenaxe defensiva funcionou á perfección. Tanto, que o Gijón quedou en tan só cinco goles durante os segundos 30 minutos. Co bastión da portería propia ao mellor nivel, só facía falta que fluíse o talento na contraria.
E aí apareceu Patrícia Lima que, ademais de dirixir, animouse a ver máis cara á portería rival. O resultado, media ducia de goles para a central portuguesa. Tamén brillaron dous das novas fichaxes do equipo miñoto: María Sancha, que deixou perlas da súa velocidade e desequilibrio, ademais de cinco goles; e Nazaret Calzado, infalible desde o extremo dereito, con outras tantas dianas.
Grazas a esa combinación, o Mecalia Atlético Guardés adquiriu pronto rendas de ao redor dos catro ou cinco goles, que lle permitiron xogar con toda tranquilidade ata o final. As xuvenís Iria Pérez e Yaiza Alonso volveron sumar un bo número de minutos -ademais dun tanto cada unha-.
Tras o torneo valisoletano, o equipo miñoto emprendeu viaxe de regreso á Guarda, onde gozará dun día de descanso antes de iniciar unha nova semana de traballo nesta pretemporada, encamiñada a chegar no mellor estado de forma posible ao debut ligueiro do próximo 10 de setembro, precisamente, en Valladolid, contra a Aula.
