O HC Deportivo Liceo, con moitas baixas xa superadas, recibirá ao Sant Cugat no Pazo dos Deportes de Riazor (domingo 16, 11:15 horas).
A OK Liga Feminina non para. Hai unha semana do meritorios tres puntos na pista do Voltregà, tras sobrevivir a unha praga de ausencias, pero a competición regresa cunha visita matinal. O HC Deportivo Liceo será o anfitrión da súa proba diante un complicado contendente: o HCP Sant Cugat (domingo 16, 11:15 h).
O obxectivo do conxunto de Stanis García, oitavo con dez puntos, será o de sumar a súa cuarta vitoria de forma consecutiva e asentarse na zona media da táboa. Sempre, iso si, con aspiración a máis. Xustamente pretenden facelo contra as súas inmediatas perseguidoras na táboa da OK Liga.
Á marxe do incidente de Mataró que terminou con derrota nos despachos por 10-0 (ao non se presentar o club verdibranco por estar pendente de probas COVID-19 sendo contactos directos de persoas positivas), as verdibrancas veñen de vencer ao mencionado Voltregà, ao Vilanova e a Las Rozas.
Stanis García non pode contar con Luchy
A gran diferenza con respecto ao primeiro triunfo de 2022 será a convocatoria, esta vez moito máis nutrida. As baixas minimizáronse ata o punto de que só haberá unha, tal e como explica Stanis García: “Afrontamos o partido con ilusión porque recuperamos a case todas as xogadoras excepto Luchy, aínda con problemas de costas”.
A lista definitiva inclúe a Viki Caretta, Mencía Mosquera, Alejandra Martín, Naiara Vaamonde, Bea Gaete, María Sanjurjo, Alba Garrote, Adriana Soto, Lucía Yáñez e Cris Diz.
O visitante do Palacio dos Deportes será o HCP Sant Cugat que adestra o técnico Beto Borregán. O conxunto catalá é agora mesmo noveno con sete puntos e protagonista dunha gran vitoria na pasada xornada (5-0 a Las Rozas).
O adestrador das galegas, Stanis García, espera, como non pode ser doutra maneira, un obstáculo de nivel: “Será un partido contra un rival que leva varias boas campañas. Transmite moita intensidade ao xogo e teremos que estar atentas”.
Como acudir ao Pazo dos Deportes de Riazor a ver ao HC Liceo?
Para este partido da mañá do domingo 16, as persoas afeccionadas ao HC Deportivo Liceo conta con varios escenarios de adquisición de pases para os liceístas que desexen animar ó equipo.
O primeiro deles está novamente destinado ós abonados beneficiarios do convenio co Real Club Deportivo. Haberá 500 pases dispoñibles sen máis custo que o tempo adicado á xestión, a realizar mediante o seguinte link de Cluber:
Na chegada ós aledaños do Pazo dos Deportes de Riazor, na Coruña, as persoas que apliquen esta posibilidade terán a obriga de presentar dous documentos: o código QR proporcionado por Cluber e o carnet do Real Club Deportivo. Serán indispensables para poder acceder.
O segundo escenario aplicarase ós socios do Deportivo Liceo, que deberán mostrar o código QR do seu carnet dixital á hora de entrar. Será a medida habitual mentres se xestionen os pases físicos. Polo tanto, neste caso non será necesaria maior xestión.
Por outra parte, o público xeral que desexe asistir ó encontro conta con entradas a un prezo de 5€ cada unha. Adquiriranse de xeito online mediante outra ligazón de Cluber:
A normativa sanitaria de acceso obriga a cumprir o protocolo COVID-19
Ademáis de presentar os documentos anteriores como contraprestación para acceder ao recinto deportivo, tamén será necesario un paso máis. Trala publicación do DOG do 17 de decembro esíxese que, nas instalacións deportivas que esperen unha afluencia superior a 200 espectadores, se comprobe antes do acceso que os asistentes maiores de 12 anos estén en posesión dalgún documento que acredite unha destas situacións:
- Que recibiron a pauta completa dunha vacina contra a COVID-19 para a cal se concedeu unha autorización de comercialización, de conformidade co Reglamento (CE) nº 726/2004.
- Que dispoñen dunha proba diagnóstica negativa realizada nas últimas 72 horas, no caso das PCR, e 48 horas no caso dos tests de antíxenos. No caso dos tests rápidos de antíxenos, deberán están enumerados na lista común e actualizada de tests rápidos de antíxenos da COVID-19 establecida sobre a base da Recomendación 2021/C 24/01 do Consello de Europa.
- Que o titular se recuperou dunha infección polo SARS-CoV-2 nos últimos 6 meses. Para iso, a persoa debe ter sido diagnosticada como caso confirmado da COVID-19 fai 11 días ou máis mediante unha proba PCR, non sendo válido outro tipo de test.
