Até onte a resposta a esa pregunta era: si. En Galicia era obrigatorio usar a máscara de protección ante a COVID-19 para poder facer deporte ao aire libre en Galicia (con algunhas excepcións no deporte federado). Así o indicaba a normativa autonómica ditada pola Xunta de Galicia e publicada no DOG en xaneiro. Pero a nova lei de ‘nova normalidade’ para conter a pandemia publicada no BOE contradí á normativa galega.
Deste xeito, a dúbida está servida, e o debate entre a cidadanía, tamén. A pregunta no colectivo de persoas deportistas galegas repítese: Cal é a norma que prevalece no ámbito territorial da nosa comunidade autónoma? Pódenme sancionar se non levo a máscara facendo deporte ao aire libre?
O certo é que non está claro aínda cal sería a norma que debería aplicarse, nin tampouco queda claro, como consecuencia se é factible sancionar a práctica individual do deporte ao aire libre sen máscara.
No debate engádese a posibilidade de que a propia administración estatal revirta a normativa ao respecto do uso de máscaras de protección tanto no caso do deporte, asunto do que estamos falando, como no caso da obriga (que tamén recolle a nova norma estatal) de usala proteción facial na praia cando se está tumbada na toalla, algo que en Galicia non era obrigatorio, pero que a norma estatal si considera necesario.
O BOE di: “Non será esixible a máscara no deporte individual ao aire libre”
O Boletín Oficial del Estado (BOE) publicaba o martes 30 de marzo unha lei que con medidas urxentes de prevención, contención e coordinación para facer fronte á crise sanitaria ocasionada pola COVID-19. No capítulo II Artigo 6 recolle ao respecto do “Uso obrigatorio de máscaras” que será así para maiores de seis anos “en espazos ao aire libre e en calquera espazo pechado de uso público ou que se atope aberto ao público”, tamén nos medios de transporte, pero matiza que esa obriga “non será esixible no caso de exercicio físico de deporte individual ao aire libre”.
No artigo 15 desta mesma lei, fálase das instalacións para as actividades e competicións deportivas e se explica que “as administracións competentes deberán asegurar o cumprimento polos titulares das instalacións nas que se desenvolvan actividades e competicións deportivas, de práctica individual ou colectiva, das normas de aforamento, desinfección, prevención e acondicionamento que aquelas establezan”.
Puntualizan que “en todo caso, deberase asegurar que se adoptan as medidas necesarias para garantir unha distancia interpersoal mínima de 1,5 metros, así como o debido control para evitar as aglomeracións. Cando non sexa posible manter dita distancia de seguridade, observaranse as medidas de hixiene adecuadas para previr os riscos de contaxio”.
Tamén se fala do caso da liga de Fútbol Profesional e a liga ACB de baloncesto, a administración competente para a aplicación do disposto no apartado anterior será o Consello Superior de Deportes, previa consulta ao organizador da competición, ao Ministerio de Sanidade e ás comunidades autónomas. As decisións adoptadas polo devandito órgano atenderán de maneira prioritaria ás circunstancias sanitarias así como á necesidade de protexer tanto aos deportistas como aos cidadáns asistentes ás actividades e competicións deportivas.
Mentres, no DOG do 26 de xaneiro de 2021 se recolle que a “obriga de uso de máscara será exixible en todo momento durante a realización da práctica deportiva individual ao aire libre”.
En Galicia compítese con e sen máscara no deporte federado
No ámbito galego hai modalidades e categorías deportivas federadas nas que se compite con máscara de protección facial ante a transmisión do coronavirus. Trátase de categorías nas que non se fan test de detección da COVID-19 cada 14 días e antes dos partidos, como si acontece noutras categorías (as estatais, por exemplo) que teñen establecidos en Galicia unha serie de controis para a deteción temperá de positivos por COVID-19 no deporte, evitando así que un posible gromo se estenda, e permitindo a competición sen máscara protectora.
Recentemente se presentou un estudo do INIBIC–SERGAS realizado en colaboración coa Secretaría Xeral para o Deporte e que abarca a máis de 180.000 licenzas deportivas (85.000 delas entre 4 e 17 anos) revela que a incidencia da COVID-19 é inferior no deporte federado nos mesmos rangos de idade e en ambos sexos que na poboación xeral. De feito, os brotes detectados apenas afectan ao 0,2% dos equipos galegos.
Entre tanto, a solución á pregunta inicial “Poño ou non a máscara para facer deporte ao aire libre en Galicia?” seguramente será resolta en breve polas autoridades competentes (autonómicas e estatais), pero á hora de escribir esta información, non temos clara a resposta e a dúbida segue no aire.
