O Poio Pescamar aposta polo talento galego para o seu futuro plantel coa fichaxe de Martita. A futbolista deixou o equipo coruñés do Viaxes Amarelle á fin da pasada tempada, e irá ao sur de Galicia para competir coas vermellas.
Na última campaña, Martita pasou varias xornadas alonxada das pistas, tras sufrir unha lesión grave de xeonllo, pola que tivo que ser intervida no mes de xaneiro.
A peche convértese así na segunda fichaxe das conserveiras, despois da incorporación da gardameta Lucía Paz. Ademais, xa foron renovadas Caridad, Irene, Dani Sousa, Luci e Ana Rivera. Como contrapunto, as pontevedresas sufren as baixas de Antía Pérez, Mirian, Clara, Iraia Arbeloa, Carol Agulla e Silvia Aguete.
