O ciclismo tamén é feminino. E se non, que llo digan ás Atlántigas, integrantes do primeiro (e polo de agora único) club ciclista feminino de Galicia. Creado hai dous anos, a súa impulsora Elena Martín explica que no equipo “a idea é fomentar o deporte e o ciclismo entre as mulleres”.
Cun grupo de Whatsapp creado para organizar saídas e un club federado, estas ciclistas comparten a súa paixón pola bici, máis aló das competicións, e cun marcado matiz social.
Despois do parón obrigado pola COVID-19, as Atlántigas volveron subirse ás bicis en abril, nunha saída técnica de BTT. En xullo, as ciclistas volven ás rúas na saída oficial do día 17 na zona de Nigrán, que incluirá a tradicional comida de verán e a estrea dunha nova equipación.
Xa en setembro, estas deportistas celebrarán o Xacobeo dunha forma especial, cunha ruta seguindo o Camiño. Tamén están a preparar unha marcha en Vigo polo Rapha Women’s 100.
As orixes das Atlántigas
No 2018, Elena Martín e unha amiga comentaron como, cando saían cos mozos, “tiñamos esa sensación de que sempre ían agardando por nós”. A agora presidenta das Atlántigas sinala como as condicións físicas son diferentes entre os xéneros, polo que, malia que “nos gusta ir con eles, ás veces queríamos ir a outro ritmo”.
Así xurdiu a idea de crear un grupo con máis mulleres apaixonadas do ciclismo para compartir a súa afección xuntas.
Martín recorda como durante un mes intentou contactar con toda ciclista que encontrase. “Cada vez que vía unha moza na bici pola estrada parábaa como unha tola. Era como as nenas no patio do cole preguntando, “queres ser a miña amiga?” Pois eu igual, “queres vir en bici comigo?””, recorda divertida.
A través deste boca-orella e a aplicación Strava, unha especie de rede social para deportistas, a proposta de Martín chegou a decenas de ciclistas. “Pensamos que íamos ser catro ou cinco e xuntámonos case 40”, explica.
Elena Martín: “No que parecía coma un deporte no que non había mozas, comezamos a saír debaixo das pedras”
Co paso das semanas, o grupo seguía medrando. “No que parecía coma un deporte no que non había mozas, comezamos a saír debaixo das pedras”, sinala.
O nacemento do club
Pasado un ano, o grupo superaba o centenar e o seguinte paso estaba claro: a creación do club. Pioneiras en Galicia, Elena Martín e as súas compañeras puxéronse mans á obra para dar lugar á primeira xunta directiva, que ela mesma preside, e crear Atlántigas.
Unha das motivacións foi axudar ás deportistas interesadas a federarse, pero sen deixar de lado ao resto. Desta forma, agora as galegas teñen dous grupos, un adicado ás saídas e quedadas e outro do propio equipo. “Cada vez que unha vai saír, e apetécelle quedar con alguén, o que fai é avisar e a xente apúntase. Dependendo de cantas saian, como e con que intención, a ruta será máis longa, máis curta, máis ou menos dura”, indica Martín sobre os dous grupos.
Desde a súa creación no 2019, o equipo xunta a 55 ciclistas en varias actividades que van máis aló pedaleo.
Máis aló da bici
Ademais de organizar quedadas e saídas, desde Atlántigas tamén adoitan organizar outras actividades. Tal e como explica Elena Martín, “todos os meses intentamos facer unha charla que sexa algo que poida interesar ás mozas. Fixemos unha de mecánica por se vas en bici e pinchas a roda, que sepas como cambiala; fixemos outra de seguridade vial para saber como ir en grupo, de dous en dous, como facer se nos van adiantar, cando chegas a rotondas, seguridade… Fixemos outra de nutrición deportiva, outro de información sobre bicicletas, cadros, materiais, manillares e sillíns…”.
Ver esta publicación en Instagram
Durante o confinamento, a imaxinación obrigou a cambiar as costumes das Atlántigas, que pasaron a súa actividade ao formato dixital. “Facíamos quedadar virtuales”, explica Elena Martín, utilizando plataformas como Bkool, que son “como videoxogos para adestrar”. Outras veces, algunha das integrantes convertíase en monitora de spinning.
Ver esta publicación en Instagram
Un club social e para todas
“Cada mes e medio ou así intentamos facer unha quedada oficial do club, na que buscamos unha ruta que se adapte a todos os niveis para que veñan mozas novas a probar e para que se poidan apuntar todas. Esas saídas son moito máis sociais”, explica a ciclista.
Atlántigas non pon ningún requisito para entrar no equipo, simplemente ter interese en calquera modalidade ciclista (estrada, montaña, ciclocrós…). Ademais, estas deportistas tampouco teñen límite de idade, con integrantes que van desde os 18 ata os 75 anos.
Así mesmo, moitas destas mozas seguen vinculadas aos seus primeiros equipos. O ciclismo é un deporte moi familiar, polo que é común que moitas persoas se adentren neste deporte desta forma. Martín explica que “é totalmente compatible estar nos dous. Podes estar en Atlántigas sen federarte, simplemente pagando a cuota do club, que son 30 euros ao ano, e xa tes acceso a todas as actividades. Tampouco fai falta que sexas do club para saír con nós en bici, quen queira vir que veña”. De feito, estas quedadas non son exclusivamente femininas, e están abertas aos ciclistas masculinos.
Elena Martín: “A nosa idea desde o principio non é competir, é ser un club máis social”
Algunhas destas ciclistas compiten cos seus clubs, xa que o equipo de Elena Martín non naceu coa idea de competir, senón “ser un club máis social“.
Porén, moitas axudas económicas están destinadas a conxuntos competitivos. Isto, sumado ao interese dalgunhas deportistas por participar nos campionatos, fai que en Atlántigas estean a plantexar a posibilidade de comezar a competir no 2022.
A rede de Women in Bike
Ademais da súa actividade en Galicia, Atlántigas non ten fronteiras. “Estamos organizando un directo en Instagram cun club de mozas de Colombia e en España estamos no Women in Bike, con tres ou catro líderes”, indica Martín.
Este programa, organizado pola Real Federación Española de Ciclismo e a Fundación Movistar, serve para visibilizar as quedadas das ciclistas femininas, con ‘líderes’ como representantes de cada grupo.
Futuros proxectos
Nos próximos meses, este grupo de galegas está a organizar coa Xunta de Galicia unha actividade especial co galo do Xacobeo.
Martín e as súas compañeiras organizan varias saídas previstas para finais de setembro, co obxectivo de que varios grupos saian de distintos puntos de Galicia ata chegar a Santiago. Unha vez alí, todas elas xuntaranse para rematar ao día seguinte a ruta en Fisterra.
Ademais, o club está conversando coa Deputación de Pontevedra e o Concello de Vigo para organizar a “primeira marcha non competitiva de mulleres”, a mundial Rapha Women’s 100, na que as ciclistas percorrerán 100km. “Anímase a todas as mulleres do mundo a facer nese día 100km en bici e nós queremos facela cunha marcha benéfica e unha comida, para tamén visibilizarnos”, resume Martín.
Atlántigas segue medrando e adaptándose aos cambios, pero cunha motivación clara: “Que ningunha moza quede en casa sen ir en bici por medo a saír soa”.
