Marta Otero seguirá defendendo a camiseta do CV Arenal Emevé. Así o confirma o club lucense que renova a ficha dunha das promesas do voleibol galego para a próxima tempada en Liga Iberdrola.
“É unha xogadora super competitiva e disciplinada, á que calqueira adestrador querría ter porque sabes que nunca vas ter unha mala cara nin un mal xesto”, di sobre ela o seu adestrador, José Valle.
Marta Otero, unha xogadora de proxección
Coa renovación da receptora coruñesa, o club lucnese conta nas súas filas por segunda tempada consecutiva cunha das xogadoras de maior proxección a nivel galego e español.
Otero seguirá defendendo as cores das loitadoras despois dun gran curso debut na Liga Iberdrola, no que conseguiu entrar varias veces no Sete Ideal da RFEVB. Xunto á capitá Lucía Prol, a xove xogadora aprendeu dela formou unha das liñas de recepción máis destacadas do campionato.
Despois de dous anos na Concentración Permanente da Selección Española e nas súas actuacións cos combinados sub18 e sub19, Otero ven de demostrar a súa valía.
José Valle: “É unha xogadora pola que apostamos na tempada anterior con vistas ao futuro”
Pola súa calidade, o técnico José Valle mostrou a súa alegría pola renovación. “É unha xogadora pola que apostamos na tempada anterior con vistas ao futuro e ten moita marxe de mellora. Esta tempada tivo unha progresión moi boa e mellorou en todas as facetas. É unha xogadora cunhas condicións físicas boas, que ten unha recepción moi boa e é algo que lle sae innato e outros fundamentos técnicos que os desenrola cun nivel medio-alto e aínda terá moita progresión neles”, comenta.
Con Otero, unha xogadora “super competitiva e disciplinada”, o Emevé afronta unha tempada máis na máxima categoría do voleibol español, onde o adestrador agarda que “esperemos que partamos desde o nivel coa que rematou esta, que estou seguro de que si, e con moitas alegrías”.
