Dúas galegas, Marta Míguez e Loli Pedrares, están entre as 27 que a RFEA inclúe nunha escolla das mulleres da historia do atletismo español.
A Real Federación Española de Atletismo está a levar a cabo co gallo do seu centenario unha serie de actividades entre das que se atopa a edición de publicacións. Na obra ‘100 años de una pasión’ repásanse este cento de anos no Atletismo estatal. Na lista de publicacións están tamén ‘Momentos de nuestra historia‘ e ‘Mujeres de nuestra historia’.
Nesta última figuran as galegas Marta Míguez (lanzadora de xavelina) e Loli Pedrares (lanzadora de martelo). A lista inclúe a outras mulleres destacadas no atletismo español como Sandra Myers, Niurka Montalvo, María Vasco, Miriam Alonso, Encarna Granados, ou Carlota Castrejana, entre doutras.
Marta Míguez, dunha aldea de Ourense a Sydney
“Louredo é a aldea na que nace Marta Míguez“, así comeza o relato da carreira desta atleta galega, lanzadora de xavelina que cada mañá, de nena, tiña que “ir a Cortegada para aprender a ler e escribir” xa que o lugar onde vivía era tan pequeniño que nin escola tiña.
Entre os seus logros deportivos, está a participación nos Xogos Olímpicos de Sydney 2000. Na publicación da RFEA destácase tamén que en Valencia, nos Campionatos de España do 2001, “alcanzou o seu tope cun lanzamento de 59,43 metros que aínda hoxe é a quinta mellor marca nacional de todos os tempos”
Tras deixar o deporte en activo chegou a ser secretaria xeral de Deportes da Xunta de Galicia.
Loli Pedrares, 11 récords de España asinados por unha de Tui
Loli Pedrares é unha arraiana. Naceu en Tui polo que con cruzar unha ponte xa estaba en Portugal, como se explica na súa semblanza no libro ‘Mujeres de nuestra historia’. Logo da súa traxectoria deportiva, Loli Pedrares segue vencellada ao atletismo xa que traballa no Programa de Atención ao deportista de alto nivel do Consello Superior de Deportes en Pontevedra.
Loli quedou ás portas de ir aos Xogos Olímpicos de Atenas. Atesora 11 récords de España en lanzamento de martelo.
