O Club Maristas Coruña recibe ao Azkoitia Azpeitia ISB no Pavillón do Colexio Maristas da Coruña mañá sábado 7 de novembro. O partido, que será arbitrado polos colexiados Jaime Enrique Álvarez-Ossorio e Samuel Martínez Covelo, está fixado para as 20:30 horas.
Voltaron das Illas Canarias cun gran sorriso na faciana. Víaselles nos ollos dado que as máscaras non permiten máis. O seu traballado triunfo 68-73 diante do Vega Lagunera de Tenerife, no que tiveron que ir á prórroga, deulles alas. Agora as galegas do Club Maristas Coruña que adestra Jorge Carreira, queren seguir sumando e facelo na casa.
Xusto no lado contrario da balanza, as guipuscoanas do Azkoitia Azpeitia ISB veñen de recibir un duro golpe ao perder contundentemente (52-99) contra outro equipo galego, o Baxi Ferrol que segue aferrado ao liderato, intratable e invicto.
