- Dous tempos para cada equipo no derbi entre Mariscos Antón Cortegada e CB Arxil. O triunfo foi para as de Vilagarcía grazas a un gran último cuarto.
O derbi entre pontevedresas na LF2 arrincaba cos dous equipos empatados a vitorias e derrotas (2-2). O duelo de rivalidade provincial e rexional determinou que o Mariscos Antón Cortegada queda por diante do CB Arxil. As locais venceron 66-51, pese a que as visitantes ían gañando ao descanso 29-32.
O baixón do CB Arxil no último cuarto determinou o resultado final dun partido que, antes dese período, non tiña un dono tan claro como reflicte o resultado final.
As verdes que adestra Maite Méndez metéranse no peto os dous primeiros cuartos. Tiñan o control do marcador, aínda que o Mariscos Antón Cortegada seguía moi de preto ao CB Arxil. Ao final do primeiro perído o resultado era de 13-15 para as visitantes. Ao descanso o marcador era para as visitantes cun curto pero efectivo 29-33.
Á volta do descanso as de Vilagarcía empezaron a collerlle máis o punto a o partido e o CB Arxil pasou ater dificultades para manter a intensidade defensiva e para xerar bos tiros a canastra. Chegouse ao final do terceiro cuarto cun 45-44 para as locais. Iniciábase así unha costa a baixo que tería o seu punto álxido no cuarto final.
Gran último cuarto do Mariscos Antón Cortegada
Meteron a directa as de Vilagarcía e non tiveron piedade coas súas veciñas. Un parcial de 21-7 deulle a volta a todo. A igualdade que houbera no resto do partido pasou á historia e o último cuarto deulle a vitoria ao Mariscos Antón Cortegada que adestra Javi Nogueira.
Sara Correidoira, MVP do partido, foi unha das principias bazas do Mariscos Antón Cortegada para levar o triunfo. Con 26 de valoración, a deportista tivo un 25% de efectividade nos tiros de tres, un 100% nos tiros libres e un 45% nos restantes. Capturou 6 rebotese anotou 21 puntos sendo a máxima realizadora do partido. Nerea Liste do CB Arxil con 15 puntos foi a seguinte mellor anotadora deste derbi pontevedrés.
Logo da disputa deste partido, as de Vilagarcía de Arousa son quintas na táboa clasificatoria da Liga Femenina 2 de baloncesto da FEB, e as de Pontevedra son novenas. O outro equipo galego da categoría, o Maristas Coruña, ocupa a undécima praza.
FICHA TÉCNICA
66) MARISCOS ANTÓN CORTEGADA: Carla García (9), Sara Gómez (14), Sara Corredoira (21), Blanca Manivesa e Mercy Aytitso Wanyama (11) – quinteto inicial -. Tamén xogaron: Nuria Choren (-), Lorena Castro Rial (2), Ángela Coello (6) e Ángela González (3).
55) CB ARXIL: Carolina Ribeiro dos Santos Bernardeco (9), Marga Moreira (10), Marie Foster (6), Nerea Liste Alfonsín (15) e Andrea Glomazic (7) – quinteto inicial -. Tamén xogaron: Carla Fernández (-), Miriam García (2), Cristina Díaz-Pache (-) e Nena Trajchevska (2).
PARCIAIS: 13-15, 16-18, 16-11 e 21-7.
EQUIPO ARBITRAL: Martín Trasancos Blanco e José Kirian Prol González, ambos os dous do colexio galego de árbitros. Eliminaron por faltas personais á xogadora do CB Arxil Nerea Liste (min. 38).
INCIDENCIAS: Derbi galego. Partido disputado no pavillón de Fontecarmoa de Vilagarcía de Arousa (Pontevedra) ante aproximadamente 500 persoas correspondente á xornada quinta da Liga Femenina 2.
