Ainhoa Marín, xogadora do Dépor ABANCA, é unha das mellores xogadoras da Reto Iberdrola, e seguirá vestindo a camiseta branquiazul tres anos máis. A futbolista pasou este mércores por rolda de prensa para falar do seu futuro como deportivista e os motivos que a levar a asinar a súa renovación.
“O principal é que aquí estou moi a gusto e son moi feliz e se está facendo un gran proxecto. Creo que o que temos que facer as xogadoras é confiar e eu confío cegamente. O estilo de xogo gústame, estou atopando moita regularidade, e principalmente por iso renovei”, explicou ante os micrófonos a catalana.
Marín: “Non sabía moi ben se estaba acertando, se eran moitos anos, que ía ser de min”
Marín seguirá sendo branquiazul tres anos máis, unha cifra que nun primeiro momento “asustou” á xogadora, “porque non sabía moi ben se estaba acertando, se eran moitos anos, que ía ser de min”, pero que finalmente aceptou xa que “falando coa miña familia e buscando un futuro para min, creo que era o mellor.
A futbolista admite que pensou na posibilidade de agardar a ofertas doutros equipos, mesmo de clubs da Primera Iberdrola, pero tomou a decisión final tendo en conta que “aquí son feliz, estou ben e agora estoume guiando por iso. Creo que estando como estou aquí rindo mellor e gústame pertencer a algo, que era algo que facía anos que non atopaba en ningún equipo. Era a oportunidade perfecta de asentarme, unirme a algo e dalo todo por iso”.
Ainhoa Marín: “Gústame pertencer a algo, que era algo que facía anos que non atopaba en ningún equipo”
A catalana apunta tamén que un dos motivos para quedar foi as persoas que atopou na Coruña. “Encaixei moi ben con todo o mundo, tanto no Dépor como na miña vida cotiá, na Universidade, con xente moi disposta a axudarme na miña situación, por adestrar e poder asistir pouco a clase. Había moita humanidade nos meus compañeiros. No club atopei algo que nunca vira, moita axuda, dispostos a ofrecerme o que necesitase e aquí estou moi cómoda”.
Co apoio da súa familia, que “me dixeron sen pensalo que si, que era o mellor”, as dúbidas da dianteira herculina disipáronse e decidiu dar o paso. Ainhoa Marín será branquiazul ata o 2025.
Unión no Dépor ABANCA
A noticia da súa renovación chegou nun mal momento deportivo para o Dépor ABANCA. O conxunto adestrador por Miguel Llorente está a ter problemas para reencontrase coa vitoria e ve perigar as súas opcións de ascender directamente de categoría.
Con todo, Marín confía nas súas compañeiras e explica que “ao final estas dinámicas aparecen nos equipos, é imposible ser tan regular, exceptuando ao Barça. Pero o bonito do fútbol é ser un equipo resiliente e afrontar isto que nos está pasando”.
Marín: “O bonito do fútbol é ser un equipo resiliente e afrontar isto que nos está pasando”
A deportivista afirma que “van chegar os puntos” xa que “é imposible que arrastremos ata final de tempada” o mal momento deportivo. “O equipo quere máis e queremos subir como calquera dos que están arriba”, engade. A catalana subliña o traballo e o esforzo que está a realizar o plantel branquiazul para que cheguen os resultados. “Estamos todas moi implicadas” asegura.
Preguntada por como influíu a súa renovación no vestiario, Marín admite que era “unha axuda para as que o estaban pensando, ao ver que alguén estaba apostando polo proxecto do Dépor de cara aos anos que veñen. Espero que se manteña o bloque e moitas veñan detrás de min”, rematou.
