Marín será o emprazamento para o Campionato de España de Clubs de Baloncesto Infantil Feminino. O vindeiro mes de xuño, os 32 mellores equipos desta categoría chegarán dende todo o país ata esta localidade, convertida xa, tras ser sede nos tres últimos anos de xeito consecutivo e tamén noutras ocasións no pasado; no escenario perfecto para acoller eventos de baloncesto base de ámbito nacional en diferentes categorías, tal e como apunta a Federación Galega de Baloncesto.
Federación Española e Federación Galega de Baloncesto depositan de novo a súa confianza no Concello de Maríne no club local, Marín Peixe Galego, como organizadores dun Campionato de España. Esta cita deportiva estatal regresa, nesta ocasión con toda a forza e as ganas de competir, tras a súa suspensión no pasado 2020 por mor da pandemia de COVID-19.
A vixente edición, correspondente á tempada 2020-2021 terá lugar entre o 12 e 18 de xuño e converterase de novo nunha aposta decidida polo deporte de formación e polo valor engadido que supón un evento de estas características.
A celebración en Marín deste Campionato de España nde Clubs de Baloncesto Infantil Feminino supón ademais a sétima ocasión consecutiva na que o nacional de baloncesto infantil feminino recala en Galicia, e en concreto na provincia de Pontevedra, para dilucidar ao seu campión.
Sedes galegas do Campionato de España de baloncesto Infantil Feminino
- Temporada 2013 – 2014: Pontevedra
- Temporada 2014 – 2015: Pontevedra
- Temporada 2015 – 2016: Pontevedra
- Temporada 2016 – 2017: Marín
- Temporada 2017 – 2018: Pontevedra
- Temporada 2018 – 2019: Marín
- Temporada 2019 – 2020: Suspendido
- Temporada 2020 – 2021: Marín
