O equipo herculino do Viaxes Amarelle FSF, dirixido por Jorge Basanta, afrontaba a semifinal, a partido único, contra o Ence Marín Futsal por un posto na final da XVI Copa Galicia Feminina FS. O triunfo caeu de lado visitante nun partido que tivo moita loita e bo xogo por parte de ambos os dous equipos.
A escuadra herculina foi a encargada de levar o peso do partido no arranque. Foron, de feito, as que empezaron adiantándose no marcador, pero o maior acerto, e unha gran actuación de Silvia Aguete na portería do Marín Futsal, terminou por decantar o partido para o lado visitante por un marcador de 1-3.
O partido empezaba cun Viaxes Amarelle FSF que tomaba a iniciativa no xogo e envorcábase sobre a portería defendida por Silvia Aguete.
As ocasións locais chegaban pronto, e Èlia Gullí conseguía adiantar ás locais aos tres minutos e medio de xogo, tras recibir un balón ao segundo pau en saque de banda e regatear na área ao seu rival para anotar o 1-0.
As herculinas seguían sendo intensas en ataque, e buscaban ampliar a renda no marcador. Mentres que o conxunto visitante seguía manténdose cunha defensa en media cancha, e tratar de sorprender á contra.
Os minutos pasaban, e o asedio das herculinas sobre a portería contraria era incesante, pero o gol resistíase a subir ao marcador, mentres se mantiña o 1-0 no marcador.
A falta de pouco menos de 4 minutos para o descanso o Ence Marín Futsal saíu nunha rápida contra por banda, e ao chegar á liña de fondo mandou o balón ao momento de penalti. Alí estaba Adriana para igualar a contenda.
O conxunto local non se deu por vencido, e tivo ocasión de volver poñerse por diante, pero o partido foise ao descanso coas táboas de 1-1 no marcador.
Logo do paso por vestiarios conxunto visitante subía un pouco a súa liña de presión de media cancha a dous terzos de pista, e incomodaba un pouco máis a saída de balón local; pero as herculinas seguían buscando o gol que as puxese de novo por diante; pero pola contra chegaba o 1-2 ao marcador, cando un disparo de Ale de Paz desde os sete metros da frontal, toca nunha defensa local, e desvía o esférico ao fondo da portería de Leti Rojo.
Tras este gol, as locais afundíronse un pouco máis en defensa, e buscaban recuperar para saír rápido en transición á contra, mentres que o Viaxes Amarelle FSF volvía ter o balón e a xerar o perigo sobre a portería de Silvia Aguete, tendo que sacar esta unha moi boa actuación para manter ás súas por diante no marcador.
No tramo final do partido, e sabendo que había que buscar a vitoria para pasar á seguinte fase, Jorge Basanta optou polo xogo de cinco para crear máis perigo, e entre unha defensa afundida de Marín e Silvia Aguete que aparecía nos momentos craves, o gol seguía sen chegar. E cando quedaban 32 segundos por diante, Cris Lourés recibía unha tarxeta vermella directa. O conxunto herculino quedaba cunha menos para os últimos segundos.
O terceiro do Marín Futsal
As herculinas optan por unha presión alta de balón no saque de falta, e buscar roubar para poder poñer a igualada, pero as visitantes aproveitan a superioridade e conseguen circular o balón, para que Ale de Paz puidese subir o 1-3 ao marcador, a falta de dez segundos para o final do partido; e deixar a eliminatoria resolta para as visitantes.
Tras este novo duelo na tempada, o conxunto afrontará este xoves unha nova sesión de adestramento, e terá de descanso a xornada do venres e o sábado, para poder chegar ao partido nas mellores condicións posibles, tras dous partidos moi disputados entre o sábado e este mércores.
A Primeira RFEF Futsal Feminina afronta a vixésima xornada da competición, en partido que terá lugar o domingo 26 de febreiro de 2023, a partir das 12:00 horas no Pavillón Municipal de Sagrada Familia (A Coruña), onde o Viaxes Amarelle FSF recibirá ao Raio Majadahonda Afar 4 FSF.
FICHA TÉCNICA:
1) VIAXES AMARELLE FSF: Leti Rojo, Carol Agulla, Lau Doce, *Èlia Gullí, Clàudia Lobo (cinco inicial), Cris Lourés, Tety, María Gómez, Estelita, Laura Rivas, Marta Hermo.
3) ENCE MARÍN FUTSAL: Silvia, María León, Ale de Paz, Pau, Ceci (cinco inicial), Adriana, Café, Bea Mateos, Lara Balseiro, Inés Mayán.
GOLES: 1-0 *Èlia Gullí (min. 3); 1-1 Adriana (min. 16); 1-2 Ale de Paz (min. 24); 1-3 Ale de Paz (min. 40).
EQUIPO ARBITRAL: Álvaro Darriba Rivas e Daniel López López do Comité Técnico de Árbitros de Lugo. Mesa: Eva López Seijas do Comité Técnico de Árbitros de Lugo. Tarxetas: Cris Lourés e Carli Romero do Viaxes Amarelle FSF (Tarxeta Amarela). Cris Lourés do Viaxes Amarelle FSF (cartón vermello). Pau e Cristóbal Quiros do Ence Marín Futsal (cartón amarelo).
INCIDENCIAS: Partido correspondente á semifinal da Copa Galicia Feminina disputada no Pavillón Municipal de Sagrada Familia (A Coruña).
