O Atlético Guardés pechou a incorporación de María Sancha, a sexta fichaxe do equipo tras o trío brasileiro formado por Tata Anselmo, Gabi Pessoa e Derborah Nunes, ademais de Ángela Nieto e Nazaret Castro. A palentina, de 19 anos, chega para reforzar a primeira liña, e declarou estar “moi feliz de que Prades contara conmigo”.
Na pasada tempada, a xogadora foi a máxima goleadora do grupo A da División de Honor Plata, na que competía co Rodríguez Cleba de León, cun total de 201 goles, aos que engadiu once máis nos partidos de eliminatoria previa á fase de ascenso, no que o seu equipo cedeu ante o Grafometal La Rioja.
Sancha poderá debutar na Liga Guerreras co Guardés
María Sancha alterna habitualmente o lateral esquerdo co centro da primeira liña, mide 1,64, é destra e destaca pola súa explosividad, que aproveita para fintar e penetrar nas defensas rivais. A nivel defensivo, disputou moitos minutos como avanzada dunha defensa 5:1 e outros modelos abertos que propoñía o seu técnico en León. Coa súa fichaxe polo Guardés, a palentina terá a oportunidade de debutar na máxima categoría, a Liga Guerreras Iberdrola.
María Sancha: “Estou súper contenta de poder dicir que vou xogar no Atlético Guardés”
“Estou súper contenta de poder dicir que vou xogar no Atlético Guardés”, declarou a xogadora. Sancha móstrase moi ilusionada co seu futuro no equipo galego, e asegura que “teño moitísimas ganas de ir para traballar e aprender, coa ilusión de que podemos conseguir moitas cousas con este equipo”.
