Unha galega representará a España no Preolímpico europeo de esgrima en florete. Trátase de María Mariño, do Esgrima Vigo Olivo, que loitará por unha praza para Toquio 2021 este domingo, 25 de abril, en Madrid. A competición terá lugar no Centro Deportivo Municipal Marqués de Samaranch.
Esta será a terceira ocasión na que Mariño acuda a un Preolímpico, despois do de Praga para Río 2016 e Bratislava para Londres 2012. Desta vez, a viguesa, que reside en Roma, competirá pola única praza que queda nos Xogos Olímpicos e, para conseguilo, terá que resultar vencedora contra o resto de participantes de distintos países. Antes desta cita, a floretista colocouse como a mellor no ránking español e máis importante aínda, primeira no ránking interno de clasificación da Real Federación Española de Esgrima, superando a María Teresa Díaz, que ocupaba unha mellor posición no ránking internacional.
María Mariño: “Confío nas miñas posibilidades”
Nunha entrevista en Ao Contraataque, da Radio Galega, a tiradora mostrouse optimista e con opcións por gañar o billete á cidade nipona. “Confío moito nas miñas posibilidades”, declarou a deportista, que parte na cuarta posición no ránking mundial. De lograr un posto nos Xogos Olímpicos, a floretista será a primeira galega en facelo nesta modalidade.
O Preolímpico no que compite Mariño poderá seguirse vía streaming nesta ligazón.
