Para María Jesús Vázquez Méndez (Cesuras, 1964) o 2022 é algo máis o inicio dun novo ano. Despois de ocupar o cargo de tesoureira da Federación Galega de Patinaxe, María Jesús Vázquez Méndez acaba de ser elixida presidenta, converténdose na primeira muller da historia en ocupar este cargo no organismo.
Por diante quédanlle algo menos de 365 días ata completar este mandato, que afronta “con ilusión e responsabilidade” e agardando a emerxencia sanitaria permita seguir coa celebración das distintas competicións. Compaxina a presidencia da Federación coa ensinanza, que exerce desde hai 30 anos.
Tal e como confesa durante a nosa entrevista, está “moi marcada pola miña profesión”. Tanto que, unha das súas aspiracións é que o deporte inculque valores á sociedade e que sirva de “complemento” para a aprendizaxe máis aló das propias aulas.
A.N.: Poderíase dicir que está de estrea. Ao inicio do 2022 ten que sumar, ademais, o seu recente nomeamento como presidenta da Federación Galega de Patinaxe. Como afronta esta nova etapa?
María Jesús Vázquez: É unha etapa, non un mandato completo. Os estatutos marcaban que había que nomear un novo presidente, pero hai que convocar novas eleccións no momento de acabar o ciclo. Eu afróntoo desde esa perspectiva, pero teño a intención de continuar sempre e cando a asemblea e os clubs estean de acordo.
A.N.: É a primeira muller que ocupa este cargo na Federación Galega de Patinaxe e unha das poucas presidentas dunha federación deportiva, cree que o seu nomeamento pode abrir camiño para que outras mulleres se animen a presentar as súas candidaturas e presidir entidades similares?
María Jesús Vázquez: Creo que si, que abre camiño, pero isto non debería ser así. Isto non debería ser un feito insólito, senón que debería ser xa algo normal… As mulleres deberían ocupar cargos deste tipo.
A.N.: Que metas se pon como presidenta neste ano que ten por diante?
María Jesús Vázquez: Pór en marcha todas as competicións que debían comezar agora, poder rematar as ligas que xa están en funcionamento e, por suposto, acadar os maiores logros posibles dentro das diferentes modalidades.
A.N.: Antes de asumir a presidencia estivo como tesoureira na Federación. Malia que leva poucos días como presidenta, imaxinamos que xa son suficientes para apreciar as diferencias diferenzas entre un cargo e o outro. Cales diría que son as principais?
María Jesús Vázquez: Estiven sete anos como tesoureira. Son cargos totalmente distintos, se ben no momento neste momento no que afronto a presidencia seguen pendentes os orzamentos de 2022, entón solápanse funcións. Agora mesmo, a miña prioridade é arrincar coas competicións anuais, as outras xa comezaron. En canto aos orzamentos, pensamos que o 2022 ía ser xa un ano de actividade normal, pero estamos á espera. No 2021 xa se fixeron moitas máis cousas das que previamos inicialmente pero o inicio deste 2022 está sendo un pouco incerto. Ademais, esta onda da COVID-19 está afectado aos tramos de idade nos que hai un maior número de deportistas.
A.N.: Como chega á Federación Galega de Patinaxe?
María Jesús Vázquez: A verdade é que comecei vendo hóckey sobre patíns no ano 88-89. O meu sobriño empezou a xogar no Hockey Club Liceo e eu ía ver os seus partidos, os campionatos nos que participaba… Anos máis tarde tiven ás miñas fillas e as tres xogan ao hóckey e estiveron en distintos clubs. Veu todo de aí.
Desde sempre me gustaron os deportes, mesmo cando aínda non era moi común que as mulleres se interesasen por eles. Gustábanme os Xogos Olímpicos, o tenis de antes de McEnroe e mesmo a Fórmula 1. Interesábanme os deportes, pero non tanto para practicalos.
Indo ver os partidos das miñas fillas dinme conta de todo o que necesitaban os clubs e intereseime por todo iso. No 2014 entrei na xunta directiva e foi cando coñecín todas as modalidades da federación, cada unha coas súas particularidades.
María Jesús Vázquez salienta a figura dos comités na organización
A.N.: Precisamente, a de patinaxe é unha Federación complexa que aglutina unha cantidade importante de disciplinas diferentes, temos deportes de equipo, individuais, patinaxe artística, de velocidade, skate, hóckey… como se organiza algo tan complexo e como se pon de acordo a deportes tan dispares?
María Jesús Vázquez: Sobre todo a través dos comités, que están formados por xente propia de cada modalidade. Os membros destes comités son os que teñen todos os coñecementos para organizar desde as competicións, os regulamentos, as bases, etc.
A.N.: Por desgraza, segue existindo a concepción de que algunhas disciplinas deportivas están máis enfocadas para homes ou para mulleres, algunhas dentro da patinaxe. Desde As Nosas defendemos que o deporte non debería ter xénero. Que calquera persoa debería poder elixir a modalidade deportiva que quere practicar máis aló de prexuízos ou convencionalismos. Hai algunha acción ou campaña que se estea levando a cabo desde a Federación para erradicar este tipo de prexuízos?
María Jesús Vázquez: Desde a Federación estamos traballando moito para fomentar as modalidades onde a muller ten unha menor presencia. Por exemplo, temos unha escola de hóckey feminino gratuíta coa que buscamos, precisamente, reforzar esa presencia. Queremos demostrar que as rapazas poden practicar este deporte con normalidade e queremos darlle visibilidade.
María Jesús Vázquez: “Temos unha escola de hóckey feminino gratuíta coa que buscamos, precisamente, reforzar esa presencia. Queremos demostrar que as rapazas poden practicar este deporte con normalidade e queremos darlle visibilidade”
A.N.: Hai algo que lle gustaría mudar na sociedade a través do deporte ou viceversa?
María Jesús Vázquez: Gustaríame que a través do deporte se aprendesen valores que considero fundamentais. Son profesora desde hai 30 anos e estou moi marcada pola miña profesión. A través do deporte temos que fomentar valores como o respecto, a tolerancia, a aprender a xestionar a frustración, o esforzo, o traballo e que para chegar a unha meta é preciso loitar. Ás veces é complicado transmitir ese discurso, pero creo que o deporte ten que complementar nese sentido.
A.N.: A coruñesa Julia Benedetti foi a primeira española en competir nuns Xogos Olímpicos na modalidade skater, Lucas Yáñez converteuse no campión mundial de patinaxe artístico. Poderíase dicir que a patinaxe galega está vivindo un dos seus momentos máis doces?
María Jesús Vázquez: Desde logo, Julia Benedetti e Lucas Yáñez son dous referentes e é tamén o caso de Unai Cereijo, subcampión de Europa cadete de patinaxe artístico; de Manuel Taibo, que conseguiu tres medallas no europeo de Velocidade; de Bruno Saavedra e Jacobo Copa, que foron convocados pola selección española Sub-17… Creo que si, estamos nun momento doce e tamén nun momento de repercusión social e mediática, o cal é moi positivo. Esta ben que estes logros deportivos tamén se reflictan a nivel social e que se lle dean a importancia que merecen.
