As corredoras cadetes María Filgueiras (Río Miera-Meruelo) e Lara Fuentes (Cambre Caeiro) forman parte da preselección de España para participar no Festival Olímpico da Xuventude Europea 2022, segundo informa a Federación Galega de Ciclismo. Nos vindeiros días coñecerase se finalmente a seleccionadora Gema Pascual as inclúe na lista definitiva para o evento que se celebrará do 24 ao 30 de xullo en Banska Bystrica (Eslovaquia).
María Filgueiras, actual campioa de España de ciclocrós
A categoría cadete feminina vive un momento doce en Galicia e as nosas ciclistas están acadando grandes resultados en diferentes modalidades. María Filgueiras e Lara Fuentes son dous exemplos e poñen de manifesto os froitos acadados polos nosos clubs tras anos mimando a base.
A ciclista de Miño María Filgueiras defende a elástica do Río Miera-Meruelo pero segue a adestrar en Galicia da man do Caimanes Betanzos, é a actual campiona de España de ciclocrós e nestes momentos ocupa a terceira praza na xeral da Copa de España de Estrada, mentres que a coruñesa do Cambre Caeiro lidera a Copa Galicia, certame que se adxudicou o ano pasado, e esta campaña asinou dos Top-10 na Copa de España.
A Federación Ciclismo Galego felicitou “ás dúas ciclistas e en xeral a toda a familia do noso pelotón feminino (clubs, técnicos, organizadores de carreiras…) por un labor de moitos anos que non pasa desapercibido fóra da nosa comunidade”.
