A Selección Española junior feminina de estrada, coa galega María Filgueiras nas súas filas, participará esta fin de semana na EPZ Omloop van Borsele 2023, unha das probas máis importantes do calendario pertencente á Copa das Nacións da UCI.
Segundo informa a Real Federación Española de Ciclismo (RFEC), tras a disputa do Piccolo Trofeo Alfredo Binda que inaugurou o circuíto internacional, a proba neerlandesa dará continuidade, entre o 21 e o 23 de abril, á competición onde o combinado español espera completar un bo papel da man dun prometedor elenco de ciclistas. Laia Bosch, Esmeralda Racionero, María Filgueiras, Daniela Grañana e Claudia Pérez Jover integran a listaxe de convocadas pola seleccionadora Gema Pascual para a cita.
A competición dividirase en tres carreiras completamente chairas que discorrerán polos arredores de Borsele, na rexión de Zelanda, con saída e chegada todas elas na localidade de ‘s-Heerenhoek. As mozas emprenderán a marcha o venres pola tarde coa contrarreloxo de 14,2 quilómetros que se antolla decisiva para a resolución da clasificación xeral.
Durante o sábado, as ciclistas, entre as que estará a ciclista de Miño María Filgueiras, enfrontaranse, a partir das 10:30 horas, ao favorable percorrido circular de 24 quilómetros que terán que completar en tres ocasiones antes de cruzar a meta.
Xa na xornada dominical, as juniors arrincarán de novo desde o mesmo punto de partida que as veces anteriores para completar o itinerario de 70,4 quilómetros da proba en liña, no que tanto a velocidade punta como o último golpe de ril poden ser claves para unha previsible entrada ao sprint.
